Obispo pangandoy makasalmot sa Sinulog

CEBU, Philippines – Auxiliary Bishop Oscar Florencio, Team Moderator sa Our lady of the Holy Rosary, Sto. Rosario Parish, malipayon nga sa labing unang higayon masaksihan niya ang gikaintapan ug gidugokan kaayong kapistahan sa Senyor Sto. Niño dinhi sa Sugbo.

Si Florencio kinsa nakahinabi sa Banat News miangkon nga dugay nang panahon niya gidamgo nga makaapil sa tinuig nga kalihukan sa Balaang Bata.

Apan tungod sa mga kadaghan sa iyang gimbuhaton sa Tacloban City nga diin siya gagikan ug nadestino kaniadto dili gayud siya makahimo sa pagtambong.

Sumala pa ni Florencio, dako kaayo iyang kalipay karon tungod kay duha ka misa ang iyang ipahigayon sa Basilica Minore del Sto. Niño nga himuon karong Enero 11, sa alas-5:30 sa buntag, ug ikaduha atol sa kapistahan sa Enero 17 sa alas-7 sa gabii.

Gitug-an ni Florencio nga gawas sa Santos nga Misa, makaapil usab siya og fluvial procession sa unang higayon kauban ang mga sakop sa Association of Women Religious of Cebu (AWROC).

Gibutyag ni Florencio, dako iyang pagmaya tungod kay ang debosyon para kang Snr. Sto. Niño nikaylap pag-ayo ug naghatag kini og paglaum sa katawhan.

Giawhag ni Florencio ang katawhan nga saulogon ang kapistahan dili lang kutob sa paglipay-lipay apan maayo tun-an ang mga birtud sa Balaan nga Bata aron ang tawo molambo ug motubo. (Rowena D. Capistrano/EIM)(BANAT NEWS)