15-anyos dalagita gitabangan og kulata

CEBU, Philippines - Gidakop sa kapolisan ang upat ka lalaki tungod sa reklamo sa 15-anyos nga babaye nga gitabangan siya og kulata sa Barangay Cansaga, Consolacion alas 11 pasado sa niagi’ng gabii.

Ang nadakpan mao sila si Mark Cyrus Cañete Angeles, 21; Kim Warls Togono, 18; Ariel Pepito ug Erwin Turno Española, 18, nga taga Barangay Pulpogan sa mao’ng lungsod. Si Police Officer 1 Socrates Borinaga, niingon nga naghangos nga nahidangat sa ilang buhatan ang 15-anyos nga dalagita kinsa gikapuyo ni Española.

Matud ni Borinaga nga pahimuslan unta sa mga suspek ang babaye apan nagdumili hinungdan nga gitabangan og kulata. Nakakita og higayon sa pagsibat ang biktima gikan sa mga suspek ug nidangop sa kapolisan. Diha’ng girekisa ang mga suspek atol sa pagkasikop, nakuha gikan kanila ang tagsa ka gagmay nga pakete sa shabu.

Kapuyo nasikop

Mokantidad halos tunga sa milyon ka pesos ang gituohang shabu nga nasakmit sa mga sakop sa Regional Anti-Illegal Drugs Special Operations Task Group-7 gikan sa duha ka suspek sa Tawog, Barangay Valladolid, Dakbayan sa Carcar pasado alas 5 sa nakalabay nga hapon atol sa buy-bust operation.

Sikop atol sa operation si Ailene Rapuela, 31, apan ang iyang kapuyo nga si Alberic John Quijano, 43, ang nakasibat human sila nibaligya og shabu sa asset sa kapolisan.

Matud ni Senior Insp. Mark Henrix Bancoleta, team leader sa RAIDSOTG-7, nga usa ka impormante ang nitug-an kabahin sa ilegal nga kalihukan sa mag-live-in, hinungdan nga ila usab kini nga gipanid-an.

Human nakatunol og drugas ang mga suspek, dali sab nga nihamag ang mga polis. Atol sa komosyon si Rapuela lang ang nahawiran sa kapolisan apan si Quijano ang nakasutoy og dagan nga gibiyaan ang iya’ng kapuyo hangtud nakasibat.

Nasakmit ang 50 ka gagmay nga pakete ug duha ka medium-size sa gituohang shabu. Gawas sa shabu nakuha usab sa kapolisan ang .38 revolver nga dunay upat ka bala.

Sumala pa ni Bancoleta nga si Quijano kanhi guwardiya nga natangtang sa trabaho hinungdan nga niapil sa negosyo sa shabu.

Gitanggong na sa selda sa RAIDSOTG-7 ang dinakpan nga gikatakdang pasakaan og tukmang kaso.

Nahagba

Nakutloan sa iya’ng kinabuhi ang usa ka lalaki human gipusil patay alas 10:40 sa gabii sa Jagna, Barangay Marigondon, Dakbayan sa Lapu-Lapu.

Ang biktima nailhan lang sa pangan nga si Terry Pilapil, hingkod ang pangedaron, taga Sitio Ilaya sa mao’ng barangay.

Matud ni Police Officer 3 Joseph Cutanda, imbestigador sa Homicide Section sa Lapu-Lapu City Police Office, nga posible’ng may kalambigitan sa ilegal nga drugas ang kamatayon ni Pilapil.

Kini human ang lugar nga nahagbaan ni Pilapil naila nga adunay daghang nalambigit sa ilegal nga drugas ug gani dili layo sa namatyan sa biktima adunay mga tinfoil nga nakita. Adunay nakuha nga .38 caliber revolver, lima ka bala ug usa ka kabhang, ug nakaangkon usab og lima ka samad pinusilan si Pilapil.

Sutaon usab sa kapolisan ang ila’ng nadawat nga taho nga nalambigit ang biktima sa pagpanulis.

Nipakunhod

Nipakunhod sa presyo sa shabu gipusil sa pusher sa Sitio Tumoy, Ibabao, Lungsod sa Cordova.

Si Senior Police Officer 1 Laurencio Wagwag sa Cordova Police Station niila sa napusilan nga si Maximo Torino alyas John, 25, ug ang nagpusil mao sila si Jordan Caño alyas Sparkle, 22, ug Jose Baguio alyas Agang, 54, pulos nagpuyo sa maong dapit. Matud ni Wagwag nga alas 6 pasado ang takna nagkita ang tulo ug nibayad lang ang biktima og P80 sa usa ka gamay nga pakete sa shabu nga nakaingon sa panaglalis tungod kay P100 ang presyo sa matag gagmay nga putos.

Dugang ni Wagwag nga gikasuko sa duha ka pusher ang gihimo sa biktima hinungdan nga ila’ng gipusil nga nakaingon sa pagkaangol apan nadakpan ang duha ka suspek. Laing pusher sa Sitio Suso, Luyang, San Remigio ang nadakpan usab sa buy-bust operation sa kapolisan ug nasakmit ang mokabat sa P76,700 nga kantidad sa shabu.

Ang nadakpan mao si Robert Baring Villegas, 32-anyos, taga Barangay Lambusan.

Si Senior Inspector Jose Rovick Villarin, hepe sa kapolisan sa Lungsod sa San Remigio, mao’y nangulo sa buy-bust nga niresulta sa pagkasikop sa suspek. (BANAT NEWS)