Duha ka babaye’ng backrider sa motor patay

CEBU, Philippines -  Patay ang duha ka babaye nga angkas sa motorsiklo sa managlahing disgrasya sa kadalanan sa probinsya sa Sugbo sa niaging adlaw.

Usa sa namatay nailhan nga si Mars Calsada, 20, samtang angol si Justinelou Valera, 18, ug ang minor de edad nga drayber, taga Goyong, Borbon, human gidumbol sa laing motorsiklo sa maong lugar.

Ang nakadumbol naila nga si Christory Quilaton, 21, nagpuyo sab sa maong lugar.

Matud ni Police Officer 1 Raffe Tejares, desk officer, nga ang mga biktima gikan sa usa ka disco sa barangay Ilihan sa maong lungsod samtang si Quilaton padulong na sab pauli gikan naghatud sa mga players sa basketball.

Dugang ni Tejeras nga samtang nagdagan ang motorsiklo nga gisakyan sa mga biktima kalit lang ni-brake ang drayber mao nga wala nakabantay si Quilaton ug wala na kalikay ug nadumbol sa likod nga bahin sa motorsiklo sa mga biktima.

Nangalagpot ang mga biktima ug dali’ng gihatud sa Don Juan Dosado Memorial Hospital sa Sogod apan si Calsada gideklarar nga dead on arrival.

Samtang sa lungsod sa Barili, patay sab ang usa ka babaye human maayo’ng pagkapilit sa motorsiklo nga ilang gisakyan sa poste pasado alas 12:00 sa udto niadtong Biyernes.

Ang namatay naila nga si  Avegail Ramos, 32, taga sitio Cantabo, barangay Gunting samtang angol  ang drayber nga si  RJ Barbon, 19, taga Pooc, dakbayan sa Talisay ug backrider nga 16-anyos nga babaye.

Base sa imbestigasyon sa kapolisan nasayran nga sa pag-abot sa barangay Tal-ot, wala na makakontrolar sa manobela ang drayber hinungdan nga nibangga sa puthaw nga poste sa kilid sa karsada.

Dali’ng gidala sa Pinamungajan District Hospital ang tulo apan si Ramos gideklarar nga dead on arrival samtang ang duha daling gibalhin sa Vicente Sotto Memorial Medical Center. (BANAT NEWS)