TEAM enforcers kinahanglang mopasilong

CEBU, Philippines — Dili obligado ang mga traffic enforcer sa Mandaue City nga magbarog sulod sa ilang tibuok walo ka oras nga duty sa tunga sa dalan ilawom sa grabeng kainit sa adlaw, isip lakang sa siyudad aron mapanalipdan sila batok sa mga sakit nga mahimong hinungdan sa taas nga temperatura tungod sa El Niño. Matod ni Traffic Enforcement Agency of Mandaue (TEAM) head Hyll Retuya, gikinahanglan gihapon nga makita ug daling maduolan sa ilang tagsa-tagsa ka assigned areas, apan gitugotan sila nga mopasilong sa mga lugar nga adunay landong kon mosamot na ang kainit.

“Dili gyud gi-require nga tibuok adlaw, eight hours gyud nga magbarog sa tunga sa dan ug magpainit. Syempre, we are after pod sa ilang health,” matud ni Retuya.

Gipasabot ni Retuya nga gilauman nga makita ang mga traffic enforcers sa kadalanan panahon sa buntag, diin dili pa kaayo init ang panahon, ilabi na sa wala pa moabot ang alas 9 sa buntag. Apan kun mosaka na ang temperatura ug mosamot ang kainit, gitugotan na sila nga mopahilayo gamay ug mopasilong basta dili mobiya sa ilang gikatakdang area.

Matod ni Retuya, pinaagi niini, makaresponde gihapon dayon ang mga personnel kon adunay mga sakyanan nga maguba, aksidente sa dalan ug uban pang insidente nga nagkinahanglan sa ilang tabang. Gipahinumdoman usab niya ang mga traffic enforcer nga magdala kanunay sa kaugalingong tubig mainom panahon sa duty aron malikayan ang dehydration. Sa pagkakaron, adunay mga 420 ka personnel ang TEAM, diin 300 niini ang gi-assign sa field operations. Matud ni Retuya, wala pa sila makadawat og report nga adunay personnel nga naka-sinati og stroke tungod sa grabeng kainit.

Nihatag usab ang TEAM og dry-fit uniforms sa mga traffic enforcers nga mas komportable karong panahona.—  IBM BANAT NEWS