Kargador gibuk-a’g ulo sa tulo

CEBU, Philippines - Maayong pagkabuak sa ulo sa usa katabang sa pagpangarga og karne sa merkado publiko nga nahimutang sa Sitio Cogon, Barangay Poblacion, Lungsod sa Liloan dihang kini gipusil sa tulo ka mga lalaki.

Ang biktima mao si Ruel Sasing, 39, nagpuyo sa maong dapit ug ang nagpusil mao ang tulo ka wala hiilhing mga lalaki nga kasarangan ang panglawas nga pulos nagsul-ob og helmet.

Si Police Officer 3 Jesson Gayo sa Liloan Police Station miingon nga nangarga og karneng baboy sa nahisgotang merkado ang biktima dihang miabot ang mga mamumuno ug kalit nga gipusil ang ulo sa biktima ug uban pang bahin sa kalawasan niini.

Human niini, daling nanakay sa ilang motorsiklo ang maong mga lalaki ug mipabulhot og padagan palayo sa maong dapit.

Si Gayo miingon nga gidala ang biktima ngadto sa Danao District Hospital apan gideklarar kini sa mga doktor nga patay na.

Sa crime scene nakaplagan ang lima ka basiyo sa kalibre .45 nga ilang gituohan nga gikan sa armas sa killers.

Ang kapolisan mohimo pa og dugang imbestigasyon pag-ila sa mga lalaki ug ingon man ang motibo sa ilang gibuhat. (BANAT NEWS)