Ihawan sa Cebu City inspeksyunon sa Mandaue
CEBU, Philippines – Mopahigayon og inspeksyon ang kagamhanan sa dakbayan sa Mandaue sa ihawan sa dakbayan sa Sugbo nga nahimutang sa Mahiga Creek aron pagsuta kung duna ba kini mga sanitary violations ug kun usa ba kini sa mga hinungdan sa nasinating pagbaha sa Mahiga Creek.
Si Mayor Jonas Cortes nga nahinabi sa mga tigbalita miingon nga ang ihawan sa Cebu City kinahanglang mokuha og sanitary permit sa Mandaue.
Susihon usab kung nibayad kini og buhis sud sa mga katuigan nga gipadagan kini sa Cebu City. Buot usab ipatan-aw ni Cortes kung padayon pa bang nag-operate ang ihawan ug kun functional pa ba ang water treatment facility niini aron limpiyo na ang tubig gikan sa maong ihawan nga modagayday sa Mahiga Creek paingon sa kadagatan.
Mipasabot si Cortes nga kinahanglan niyang buhaton ang maong lakang sanglit dili makiangayon nga ang Mandaue City lang maoy dakdakan sa mga basol tungod sa pagbaha sa maong lugar.
Di pa lang dugay, gimando ni Cortes ang pagdemolis sa kabalayan sa Mahiga Creek nga gipuy-an og 153 ka pamilya sa Sitio Mahayag sa Barangay Subangdaku. Kini tungod sa pag-awhag sa Cebu City.
Sunod nga demolison ang 100 ka panimalay ug mga foot bridges pikas habig sa Mahiga Creek nga giingong nag-unang hinungdan sa mga pagbaha sa maong dapit. – /EIM) (BANAT NEWS)
- Latest
