Ilegal fishers nasikop sa Bogo
CEBU, Philippines - Gisikop ang upat ka mananagat human naaktohan sa Bantay Dagat sa dakbayan sa Bogo nga ilegal nga nangisda sa kadagatan sa barangay Nailon gamit ang compressor niadtong nakalabay nga gabii.
Ang mga nasikop naila nga sila si Harry Muaña, 33; Benjamin Yaun, 41; Mario Yaun, 50; ug Bedy Lopez, 38; pulos taga barangay Gairan sa maong dakbayan.
Matud ni Police Officer 2 Orland Alico, desk officer sa Bogo City Police, nga ang Bantay Dagat nga gipangulohan ni SPO3 Vincent Canama ug kaubanan ang nakasakop sa upat nga migamit og compressor sa pagpanguha og isda. Gisakmit sa kapolisan ang usa ka pumpboat nga gisakyan sa upat, usa ka compressor, tulo ka metros nga hose; tulo ka styrofoam, tulo ka pana, pito ka litrong gasolina, taas nga pisi ug uban pa’ng gamit sa panagat.
Sumala pa ni Alico nga kagahapon sa buntag gibuhian nila ang upat human nakamulta og P10 mil sa paglapas sa City Ordinance nga nagdili sa paggamit og compressor sa pagpanagat.
Gibutyag ni Alico nga mga “first offender” pa ang maong mga mananagat diin multa lang ang mahimo niining bayad apan kung madakpan sa ikaduhang higayun,pasakaan na og kaso. (BANAT NEWS)
- Latest
