Ex-con gikasohan og rape

CEBU, Philippines -  Gipasakaan na og kasong rape ang usa ka giingong “hired killer” nga gipasanginlang milugos sa 16 anyos nga dalagita sa makalima ka higayun ug mibahad pa nga patyon ang iyang tibuok pamilya.

Ang gipasakaan og kaso mao si Norman Maramara, 50, taga Sitio San Vicente, Bulacao-Pardo, dakbayan sa Sugbo.

Base sa dokumento nga nakuha sa Banat News nga ang biktima mipasangil sa suspetsado nga gilugos siya sukad niadtong Pebrero hangtud Hunyo 3 karong tuiga. Kaliwat ni Maramara nga higala sa biktima ang giingong misulti kaniya nga dunay plano ang suspetsado sa pagpatay kanilang tanan tungod kay gusto niining ipa-atras sa amahan sa biktima ang laing kaso nga gipasaka batok sa anak sa suspetsado.

Gipasakaan og kaso ang anak ni Maramara tungod sa pagdunggab sa amahan sa biktima.

Matud pa nga nakigtagbo ang biktima sa suspetsado ug mihangyo nga dili niini dayonon ang plano sa pagpatay kanila apan giingnan nga “unya sugot ka nga ako lang ka?”

Ang biktima namahayag nga nahadlok siya sa suspetsado tungod kay bag-o lang kini nakagawas gikan sa New Bilibid Prison sa Muntinlupa.

Miingon ang biktima nga Pebrero 17 miadto ang suspetsado sa ilang balay ug mitawag nga pakuyogon kaniya.

Gidala sa suspetsado ang biktima sa usa ka balay sa Talisay ug didto gilugos sa unang higayun.

Niadtong ikaduhang semana sa Mayo gilugos na usab siya sa suspetsado ug giingnan nga “ayaw kahadlok kay gastohan tika” sa dihang nipadayag sa kahadlok ang biktima nga mabuntis.

Pasado alas 9:00 sa Hunyo 3 samtang didto siya sa eskwelahan mi-text ang suspetsado ug miingon nga makigkita sa biktima hinungdan nga gitawag niya ang iyang igsuon aron magkuyog sila pag-uli tungod sa kahadlok.

Apan giingong usa ka lalaki ang misunod kanila ug may gibunot sa kilid nga gidudahang pusil hinungdan nga iyang gipauna pagpauli ang iyang igsoon. Mikuyog ang biktima sa suspetsado ug gilugos na usab sa pipila ka higayun apan wala na maka-agwanta ang biktima hinungdan nga mitaho na kini sa kapolisan ug mipasaka og kaso batok sa suspetsado kinsa nagtago-tago na sa pagkakaron.  (BANAT NEWS)