Shotgun sa guwardiya mibuto duha angol

CEBU, Philippines - Duha ka tawo usa niini menor de edad ang nasamdan human aksidenteng mibuto ang shotgon nga service firearms sa guwardiya sa Mactan Doctors Hospital sa dakbayan sa Lapu-Lapu sa milabay’ng gabii.

Ang maong insidente nahitabo diha sa sulod sa nahisgutang tambalanan dihang nag-roving ang guwardiya nga si Reymart Hida Dano, 23, residente sa Barangay Baring, Isla sa Olango ug sakop sa Fair Security Agency.

Ang biktima mao si Marvin Basco Abejero, 26, janitor sa nahisgutang tambalanan, taga Barangay Pajac, dakbayan sa Lapu-Lapu ug Wendel Redelosa Capina, 17 taga Barangay Looc sa nahisgutang siyudad.

Sa imbestigasyon ni SPO2 Manolito Abellanosa ug PO3 John Carlo Jacutan giingong  nag-roving sa 3rd floor sa tambalanan si Dano ug pag-abot niini diha sa may entrance sa female surgical ward kalit nga mibuto ang 12 gauge nga shotgun nga service firearms niini.

Maayong pagkaukab sa tiles sa tambalanan ug si Abejo kinsa nanglimpiyo niadtong higayona napiksan ang tiil niini sa shrapnels sa bala lakip si Capina nga nagtan-aw og TV napiksan usab ang tiil sa shrapnels.

Ang duha gidala dayon diha sa emergency room sa tambalanan samtang si Dano boluntaryong mitahan sa iyang kaugalingon ngadto sa kapolisan lakip na ang shotgun.  (BANAT NEWS)