Toledo PNP andam sa rali

CEBU, Philippines -  Ang kapolisan sa dakbayan sa Toledo nangandam na’ng daan sa gilaraw nga rali sa mga mamumuo sa Carmen Copper Corporation (CCC) sa Barangay Don Andres Soriano, nga naila kaniadto nga Lutopan. Matud ni Chief Inspector Michael Bastes, hepe sa Toledo City Police Station, nga ang iyang opisina nakadawat og kasayuran sa pagahimuon nga rali-protesta sa mga mamumuo nga sakop sa Panaghiusa sa Mamumuo sa Carmen Copper (PAMCC) batok sa ilang management.

Ang mao nga mga trabahador nga gipangulohan ni Antonio Cuizon, kanhi pangulo kaniadto sa Panaghiusa sa mga Mamumuo sa Atlas (PAMA) maoy mipahibalo sa gilaraw nila nga welga.

Matud ni Bastes nga gikonsulta na niya ang kadagkoan sa Department of Labor and Employment (DOLE) kabahin sa gilaraw nga rally protesta sa nahisgutang grupo sa mga mamumuo.

Si Bastes mikonsulta daan sa DOLE aron masayod siya unsa g’yuy trabaho sa kapolisan kun adunay protesta nga pagahimoon ang mga trabahador nga adunay kalabotan sa ilang trabaho.

Ang opisyal sa kapolisan sa Toledo miingon nga ipatuman g’yud nila ang “maximum tolerance” kon pagkamapailobon sa higayon nga ipahigayon na ang rali sa labor union.

Apan giklaro ni Bastes nga kun ang mga mamumuo mohimo na og kagubot atol sa ilang rali-protesta, dili sila magpanuko sa pagpatuman sa balaod.

Matud ni Bastes nga sila’ng mga polis dili mokompyansa sa pagahimoong protesta sa grupo ni Cuizon ilabi na nga adunay mga tawo nga posible nga nagdumot sa mao nga lider sa pamuo.

Si Cuizon kaniadto gi-ambush didto sa Naga apan wala mamatay. Si William Ligutan nga lider usab sa Carmen Copper Worker’s Association nga kaatbang nga labor union ni Cuizon, gisuwayan usab pagpatay.             

Ang rali-protesta nga gilaraw ni Cuizon kabahin sa iyang pagkwestyon sa legalidad sa pagkadaug sa Carmen Copper Worker’s Association sa labor election nga maoy tugotan nga makarepresentar sa mga mamumuo ngadto sa management sa mining corporation.  (BANAT NEWS)