Lolo nga naglikaylikay sa libaong nadasmagan patay

CEBU, Philippines - Patay ang usa ka lalaki human kini nabanggaan samtang sakay sa iyang biseklita sa awto nga gimaneho sa usa ka sakop sa Philippine Navy sa barangay Don Virgilio Gonzales sa lungsod sa Medellin sa lalawigan sa Sugbo sa alas 4:20 sa hapon sa miaging adlaw.

Wala na makaabot nga buhi si Praxides Alarde Apuya, 75, molupyo sa barangay Don Vergilio Gonzales sa lungsod sa Medellin. Mitahan hinuon dayon sa kapolisan si Petty Officer 2 Rogaciano Arnoco Monares, 52, taga barangay Marigondon sa dakbayan sa Lapu-lapu.Si SPO3 Roland Reyes nga nahinabi sa Banat News mibutyag nga dihang iyang gipangutana si Monares kini mitug-an nga nag ekis-ikis ang dagan sa biseklita sa biktima tungod sa libaong.

Matud pang Reyes nga samtang naglikay-likay sa libaong dunay laing sakyanan nga gikasugat ang biktima ug napunta sa agianan ni Monares ug nadasmagan kini sa walang bahin sa awto. Daling gidala ni Monares sa Bogo City Provincial Hospital ang biktima apan gideklarar kini nga dead on arrival. Hinuon gibuhian ra si Monares human magkasabot sa pamilya nga abagahon ang danyos ug gastos sa paglubong ni Apuya. (BANAT NEWS)