NFA mo-supply ug bugas sa feeding program sa Probinsiya

CEBU, Philippines — Ang National Food Authority (NFA) mosuplay og inisyal nga 5,000 ka sako sa bugas sa Probinsya sa Sugbo alang sa mga programa niini.

Sa nasayran naapektuhan ang mga programa sa Kapitolyo nga nagkinahanglan og bugas human nga napakyas ang NFA kaniadto pag suplay sa Probinsya.

Si NFA Acting Administrator, Larry Del Rosario Lacson atol sa iyang pagbisita sa buhatan ni gobernador Gwendolyn Garcia nangayo og pasaylo sa gobernador sa wala paghatag sa NFA og bugas sa Kapitolyo tungod kay mismo ang ahensya menus sab ang suplay sa bugas.

Nisaad hinoon si Lacson nga palabihon sa NFA ang pagsuplay og bugas sa Sugbo School Feeding Program sa probinsya sa Sugbo.

“We promise to look for ways to support the feeding program,” matud ni Lacson sa taho sa news arm sa Kapitolyo, ang Sugbo News.

Ubos sa maong school feeding program, 878,000 ka mga tinun-an sa DepEd gikan sa kindergarten ngadto sa Grade 12 ang makakaon.

Gipahibalo sab sa gobernador ngadto kang Lacson nga dako ang tampo sa NFA nga bugas sa pagpatuman sa mga "pro-poor' nga programa sa Kapitolyo sama sa Bugasan sa Kababayen-an sa Barangay diin ang nagkadaiyang grupo sa kababaenhan mobaligya sa bugas og tag P27 matag kilo ngadto sa mga barangay ug ang Sugbong Merkadong Barato, ang programa nga nituman sa saad ni Presidente Bongbong Marcos nga mapalit ang bugas sa P20 matag kilo.

Si Garcia nagkanayon kang Lacson nga nanghinaot ang Kapitolyo nga tibuok nga suporta ang mahatag sa ahensya ngadto sa Probinsya sa nagkadaiya niini inisyatiba. (BANAT NEWS)