DNA test hayan himuon sa mga nakalas nga lisud ilhon

CEBU, Philippines - Gipahibalo ni Cebu City Councilor Gerardo Carillo nga duna nay mga kahimanan ang Department of Health ug ingon man ang National Bureau of Investigation aron makapahigayon og deoxyribonucleic acid (DNA) test.

Ang maong DNA test mao unyay gamiton kun ugaling nga dunay mga patay’ng lawas nga naugkat gikan sa nalunod nga barkong MV St.Thomas de Aquinas diha sa Lawis Ledge sa barangay Tangke sa siyudad sa Talisay niadtong Biyernes sa gabii.

Si Carillo nga maoy gitudlong tigpamaba sa Command Post sa search and rescue/retrieval operation sa pakighinabi sa Banat News kagahapon miingon nga kadtong maugkat nga lawas dad-on sa Cosmopolitan Funeral Parlor diha sa dalan Junquera sa siyudad sa Sugbu. Matud pa niya gikan sa dagat dad-on sa command post ang mga patay’ng lawas alang sa identification una pa dad-on ngadto sa maong punerarya.

Kadtong mga dili dayon maila sa ilang mga kabanay hipuson diha sa maong punerarya hangtud nga kini ma-identify pinaagi unya sa DNA testing.

Ang DNA testing maoy labing epektibong pamaagi aron masubay ang pamilya sa mga biktimang imposible nang mailhan tungod sa kagrabehon sa pagkadugta sa lawas  sa usa ka minatay.

Sama sa gibuhat kaniadto sa pagkalunod sa MV Princess of the Stars sa Sulpicio Lines pipila ka tuig na ang milabay, mokuha og sample sa mga hingtungdang pamilya ang mga forensic experts aron i-crossmatch sa mga specimen alang sa DNA test gikan sa mga patay nga naugkat. Sa labing uwahing report, sa 32 ka mga nakalas nga gidala diha sa maong punerarya siyam na niini ang nailhan sa mga kabanay. Duha kanila mga crew sa barko.

Matud pang Carillo ang gastos sa punerarya abagahon unya sa hingtungdan nga kompanya nga nalambigit sa aksidente.

Ang MV St. Thomas de Aquinas nalunod human magkabinanggaay sa MV Sulpicio Express 7. (BANAT NEWS)