Sitoy giakusahang nagpasipala sa press freedom

CEBU, Philippines - Gihulagway ni Atty. Christina Garcia Frasco, usa sa anak ug abogado ni suspended governor  Gwendolyn  Garcia, nga usa ka pagpasipala sa Freedom of the Press ang pagtawag ni bokal Arleigh Sitoy nga usa ka "unwanted child" sa gobernador ang Sugbo TV ug ang Sugbo News hinungdan nga hingpit niyang gi-withdraw ang ordinansahon nga nag-institutionalized sa Sugbo TV ug Sugbo News nga gimugna ni Gov. Gwen Garcia.

 Sigun pa ni  Frasco nga dili makatarunganon ang pamahayag ni Sitoy tungod kay ang Sugbo TV ug Sugbo News maoy responsabli sa pagpaila  sa mga kalamboan sa kalungsoran hinungdan nga naila ug milambo ang lalawigan sa Sugbo. Gani mao kini ang nag-unang hinungdan nga mipasar si Sitoy   sa maong ordinansahon kay naghatag man kini og dakong garbo sa mga Sugboanon. Midugang  siya   nga ang pamahayag ni Sitoy tataw nga   dakong insulto sa mga kabataan nga maoy gihimong sambingay sa iyang pagsaway sa Sugbo TV ug Sugbo News tungod lamang sa ilang grabing pamolitika.

 Gipasabot niini nga klaro kaayo nga pamolitika ang pagwagtang sa lakang  sa  paghimong  inila sa Sugbo TV ug Sugbo News tungod kay napanday ang maong lakang dihang si Sitoy mipaluyo pa sa gobernador apan karon nga managlahi na ang partido sa politika niini, gisalindot ra usab ang maayong katuyoan aron pagpanimalus sa gobernador. Subling gitataw ni Atty. Frasco nga ang maot nga pamahayag ni Sitoy batok sa Sugbo TV ug Sugbo News usa ka pagpasipala sa Freedom of the Press bisan pa man og ang nagdumala niini mao ang kagamhanan sa lalawigan sa Sugbo.

Apan  si Sitoy  sa iyang  bahin igo  lang  miingon  nga makatarunganon  ang  iyang  pagpasira  sa Sugbo TV ug Sugbo News. (BANAT NEWS)