NSO milusad og survey sa mag-uuma ug mananagat

CEBU, Philippines - Gimando ni Presidente Benigno Aquino   ang pag-survey sa mga mag-uuma ug mananagat sa nasud aron masuta kun kinsa   kanila ang angay tabangan ug unsa usab ang angay itabang kanila sa kagamhanan

Matud pa ni OIC Regional Director Firmo Diputado sa National Statistics Office (NSO) atol sa AGIO Forum kagahapon sa buntag didto sa iyang buhatan ug gipalanog usab sa DYMR nga gumikan sa maong kamandoan gisugdan dayon nila ang house to house nga pag-survey sa mga hingtungdan niadtong Oktubre 1, 2012.

Matud pa ni Diputado nga ang paglusad nila programa sa Registry System in Agriculture and Fishing (RSAF) giduyog usab sa kasaulogan sa National Statistics Month niining buwan sa Oktubre.

Segun sa mando sa pamuno nasud, nga ang resulta niining RSAF maoy basehan sa kagamhanang nasudnon pagsuta sa katibuk-ang gidaghanon sa mga molupyo kansang panginabuhi gibase gayud sa lunod-patay nga pagtikad sa yuta ug sa panagat sa kadagatan.

Midugang si Diputado nga masuta dinhi ang mga molupyo kinsa gihimo lang sideline sa panginabuhi ang pagpanguma ug panagat   kay may giatiman silang trabaho nga maoy  ilang mainline sa panginabuhi. Apan matud pa niya nga kadtong molupyo nga panguma ug pangisda ra gayud ang panginabuhi kansang pagpuyo pirming giapas sa kakabus, maoy tutokan sa kagamhanan ug sination kun unsay angayang itunol kanilang hinabang aron mabuhi sila ug mahaw-as gikan sa kakabus. Miingon si Diputado nga kining maong matang sa survey una pa sa iyang matang nga gipatuman sa kagamhanan pinaagi sa NSO.

Kini sa dihang nasuta sa pamuno nasud nga sa matag karon ug unya madungog niya nga kasagaran sa mga molupyo nga nahimutang sa labing kabus sa panginabuhi mao ang anaa sa sektor sa panguma ug sa pangisda.

Matud pa ni Diputado nga nabalaka ang pamuno nasud kay di man unta angay nga makaluluoy ang maong sektor tungod kay anaa kanila ang yawe sa pagkaon sa mga Filipino. Busa pinaagi sa paglusad niining RSAF, makahimo og tukmang lakang ang kagamhanan aron makabangon sa kalisud ang gitawag nga labing kabus nga mga Filipino sa nasud. Samtang midugang siya nga kauban sa kasaulogan sa National Statistics Month, mao ang National Statistics Quiz nga ipahigayon karong Nobiyembre ning tuiga.

Kini aron paghatag og higayon sa tanang mga  freshmen o mga estudyante nga nagtungha sa unang ang-ang sa mga kolehiyo nga publiko ug pribado nga makapaila sa ilang abilidad ug sa limitasyon sa ilang hiantigohan sa ilang pagtungha.

Matud pa ni Diputado nga sa mga eksamin nga  gipahigayon sa NSO sa maong level sa mga estudyante, may mga estudyante na dinhi sa rehiyon 7 nga nahimo na nga mga mananaog sa bangga nga nasudnon sa tag-as og nakuha nga grado sa maong quiz. (BANAT NEWS)