Garcia nakakuha'g suporta sa LMP ug VMLP

CEBU, Philippines - Nakakuha og suporta gikan sa nagkadaiyang lokal nga mga mayor ug bise mayor sa nasud si Gobernador Gwendolyn Garcia kinsa naimbitar sa tigom sa League of Municipalities of the Philippines (LMP) Mindanao Island Cluster Conference nga gipahigayon sa dakbayan sa Cagayan de Oro niadtong Agosto 29.

Samtang susamang suporta usab ang nadawat ni Garcia gikan usab sa habig sa mga bise mayor sa nasud nga mipasar pa og resolusyon pagpadayag sa ilang suporta sa kandidatura ni Garcia kung kini modagan sa pagka-senador karong 2013.

Si Garcia mitambong sa fellowship dinner human dapita ni LMP Mindanao Island Cluster President Loreto Cabaya Jr. sa tuyo nga makakuha og ideya o makat-on gikan sa gobernador ang mga sakop sa ilang pundok sa mga ‘best practices’ nga gihimo sa kagamhanan sa lalawigan sa Sugbo.

Si   Cabaya miingon nga nahimong venue ang naasoy nga tigum aron mapadangat ang ilang mensahe sa nasudnong kagamhanan.

Diha usab sa maong tigom gikatahong mipadayag ang mga sakop sa LMP sa ilang pagsuporta kang Garcia sa pagdagan niini sa pagkasenador.

Ang maong pagdayeg ilang gipadangat mismo sa National President sa LMP nga si Mayor Donato Marcos uban nila ni Cabaya, LMP Agusan del Sur Mayor Salimar Mondejar, LMP Province of Iloilo president Mayor Matet Debuque ug LMP Davao Del Sur President Mayor Franco Calida.

Ang VMLP mipasar og usa ka "resolution of support" alang kang Garcia kinsa maoy mi-host sa usa ka welcome dinner nga gihimo diha sa Capitol Social Hall alang sa mga mitambong sa 3rd National Executive Board Members Meeting sa VMLP dinhi sa Sugbo.

Ang maong resolution gitunol mismo sa Executive Vice President sa VLMP nga si Batac Ilocos Norte Vice Mayor Ronald Allan Nalupta uban usab sa mga VMLP presidents sa nagkadaiyang lalawigan sa tibuok nasud. ( /EIM)   - BANAT NEWS