2 'pusher' sikop sa PIB

CEBU, Philippines - Duha ka mga gituohang drug pusher nadakpan sa mga operatiba sa Provincial Intelligence Branch sa managlahing barangay sa siyudad sa Danao.

Duha ka managlahing team nga gipanguluhan nila ni SPO1 Francis Allen Villamor ug PO3 Reynaldo Solante miaresto nila ni Bryll Morillo, 22, taga Highway Looc ug Raymond Bongo, taga Barangay Maslog. Ang mga suspetsado anaa na karon sa karsel sa Danao City samtang nagpreparar ang kapulisan sa kasong Section 5 and 11 of the RA 9165 or Dangerous Drugs Act of 2002.

Sa unang operasyon, ang operatiba nagmalampuson nga midakop ni Morillo mga alas 5:00 sa kahapunon niadtong Miyerkules. Nakuhaan siya og usa ka medium nga pakete nga mokantidad og P1,000 ug mga nagkadaiyang drug paraphernalia. Ang operatiba mipatuman sa maong operasyon human makadawat og reklamo gikan sa mga residente sa maong lugar.

Ginamit ang P500 sa transakyon bugti sa usa ka gamay’ng pakete sa drugas ang nagsilbing ebidensiya sa pag-aresto ni Morillo.

Sa laing bahin, maayong pagkasikop ni Bongo sa samang operasyon human kini midawat sa P300 gikan sa poseur buyer nga mipalit og usa ka gamay nga pakete sa shabu kagahapon sa kaadlawon sa Barangay Maslog.

Gawas sa maong pakete, narekober usab kang Bongo ang tulo ka medium nga pakete, P3,000 ug usa ka .45 caliber pistol nga dunay unom ka buhing bala. (BANAT NEWS)