Mikuha sa motor sa higala nadisgrasya

CEBU, Philippines - Duha ka mga lalaking gipasanginlang nangawat og motorsiklo ang talandugon ang kahimtang human maaksidente atol sa ilang pag-ikyas kagahapon sa kaadlawon sa barangay Caceres sa lungsod sa Oslob.

Ang nangadisgrasya ug hayan sa prisohan motugpa ini og gawas sa tambalanan mao sila si Rusel Angelo David Gumapan , 22, taga Brgy. Luca sa lungsod sa Oslob ug si Ralph Yburan, 23, residente sa Cangcuay sa mao gihapong lungsod. Si PO2 Johnny Tapales nga nakahinabi sa Banat News miingon nga pulos hubog ang duha nianang tungora ug giingong mikawat sa motorsiklo sa usa ka Rolando Jasom nga taga barangay Luca nga gibilin sa tag-iya sa vulcanizing shop ni Jasom sa national highway sa barangay Poblacion, Oslob.

Matud pa samtang natulog si Jasom gikuha sa duha ang motor niini ug gimaneho ni Gumapan ug miangkas si Yburan paingon sa norte apan misampak sila sa concrete railings.

Ang duha nakaangkon og grabeng kadaot sa kalawasan ug gidala sa Oslob District Hospital ug gibalhin sa laing tambalanan sa dakbayan sa Sugbu. Nagpaabot pa ang kapolisan kun mopasaka og kaso si Jasom batok sa duha kinsa nasuta usab nga amigo ra niini. (BANATNEWS)