Baclaan gikiha'g murder

CEBU, Philippines - Human ikapasaka sa korte ang kasong illegal position of firearms batok kang Rene Aligato Baclaan alyas Insek , gisunod usab  pagsang-at ang kasong murder batok kaniya. Kini human siya positibong giila sa mga saksi nga maoy mipusil patay sa giingong sakop sa Crips Gang.

Si Baclaan gipasakaan sa kasong murder uban sa laing duha ka tawo nga wala pa hiilhi ug wala hidakpi gumikan sa pagpusil patay nila ni Anthony Gabunada niadtong Pebrero 12 , 2012 pasado alas 12:00 sa kadlawon .

Base sa gipanumpaang affidavit sa kauban ni Gabunada nga si Elmer Medilo Zabate,16, ug Junrey, 17, misaysay nga sila ug ang biktima maoy nagkuyog samtang nagpaabot og sakyanan aron mamauli sa ilang tagsa-tagsa ka balay.

Dihang kalit lang nakita nila ang nagsingabot nga auto nga kolor gray ug dihang nahiduol na kini sa ilang nahimutangan, mihinayhinay ang dagan niini, kini dayon giablihan ang bintana sa likod ug nakita nila si Baclaan nga maoy miluthang kang Gabunada uban usab sa laing lalaki nga naglingkod sa atubangan sa sakyanan.

Matud pa sa duruha human mahagba si Gabunada misirit og dagan pahilayo ang auto nga gray busa dali nilang gidala ang biktima sa Cebu City Medical Center kansang lawas nabulit sa mga samad pinusilan ug nawad-an na sa panimuot .

Apan pag-abot nila sa tambalanan gideklarar kini nga dead on arrival. Nianang pagka-Martes, Pebrero 21 ilang nasayran nga si Baclaan nasikop sa mga sakop ni Chief Inspector Romeo Santander sa City Intelligence Branch tungod sa paghupot og armas de fuego nga walay lisensya. Hinungdan nga dali silang miadto sa Cebu City Police Office aron sutaon kun si Baclaan ba gayud ang tawo nga ilang nakita nga namusil kang Gabunada.

Wala sila mosipyat kay natino nila nga positibo gyud si Baclaan, nga maoy   usa sa mga mipusil ni Gabunada.

Ilang gipasaka ang kasong murder batok kang Baclaan human sa positibong pag-ila sa mga saksi kaniya nga mipusil patay kang Gabunada.(/WC)  (BANATNEWS)