Polis gireklamo sa pari kay 'arogante'

CEBU, Philippines - Nag-atubang og imbestigasyon ang usa ka polis sa lungsod sa Pinamungahan human gireklamo sa usa ka pari sa maong lungsod tungod sa wala pagtagad kay kini natulog ug arogante pang miatubang kanila.

Si Rev. Fr. Mark Barneso, assistant kura paroko sa simbahang katoliko sa Pinamungahan mireklamo batok kang SPO1 Bartolome Fajardo nga natulog sulod sa police station nianang alas-9 sa miaging duha ka gabii ang nakalabay dihang nangayo siya og police assistance.

Dugang pasangil sa maong pari nga walay laing pulis sulod sa police station gawas kang Fajardo nga nagsibilyan lang kay nag-basketbol ang mga kauban niini.

Sumala pa nga nagkalalis ang duha tungod kay wala kini motubag sa iyang pagpangayo og tabang kay mirason kining wala siya’y mga kauban, apan kini gihimakak ni Fajardo.

Ang pari mipadala og text ngadto kang Super Bobby Nalzaro sa DySS radio ug gireklamo si Fajardo.

Si Sr. Supt. Patrocinio Comendador mipadala og mga imbestigador didto sa lungsod sa Pinamungahan ug mipabalhin kang Fajardo sa provincial headquarters.

Wala pa makakuha og kompletong detalye si Comendador kanus-a ug unsa untay ireklamo sa pari sanglit wala man kini ma-blotter.

Giklaro hinuon ni Comendador dili tinuod nga walay pulis ang police station niadtong higayona kay ang mismong hepe stay-in ug diha kini sa iyang lawak atol sa hitabo apan uwahi nang gisultihan ni Fajardo sa insidente. Diha usab ang naka-duty nga polis sa luyo sa police station nagpundo.

 “Mas motuo ko sa hepe nga naay pulis sa luyo samtang ang uban nag-basket hinuon kay naa man silay duwa tali sa pari. Ang kura paroko maoy nagduwa og basket(ball) niadtong higayona samtang si Fr. Barneso wala moduwa,” pasabot pang Comendador ug miawhag sa pari sa pagsang-at og pormal nga reklamo.  - BANAT NEWS