TCPS wa pay security plan alang sa pista

CEBU, Philippines - Nangandam na ang dakbayan sa Talisay alang sa umaabot nga kapistahan niini karong Oktubre 15 ug gipaabot nga daghang kalingawan ang ipahigayon sa unang semana ning buwana diha sa Talisay City Sports Complex sa barangay Poblacion ug ngadto sa ubang barangay.

Gilauman usab nga daghang mga tawo hinungdan nga ang kapolisan gipaabot nga mohimo og security plans sa maong mga adlaw tungod sa napanglantawang hasta mga badlungon mangabot usab aron mamiktima.

Si Supt. Eddie Recamara, officer-in-charge sa Talisay City Police Station sa pakighinabi niini sa mga tigbalita nagkanayon nga naghuwat pa sila sa city hall aron mahatagan og kopya sa programa sa mga kalihukan may kalambigitan sa pista aron makagama sila og security plan kabahin niini.

Hinuon bisan og wala pa ang programa matud sa OIC nga padayon ang ilang pagbantay sa palibot sa siyudad aron mamentenar ang kahapsay ug kalinaw.

Matud usab niya nga sa mga liga sa basketball nga gipahigayon diha sa sports complex karon walay nahitabong kasamok o gubot tungod kay duna may mga night watch nga nagsige og patrolya.

Si Arturo Bas, public information officer (PIO) sa siyudad sa pakighinabi niini sa Banat News kagahapon nagkanayon nga wala pa sila makagama sa programa sa mga kalihukan may kalambigitan sa pista. (BANAT NEWS)