Tungod sa selos dalaga napusilan

CEBU, Philippines - Gumikan sa selos, napusilan ang usa ka dalaga sa hubog niyang ig-agaw didto sa barangay Agtugop, lungsod sa Asturias sa miaging buntag.

Ang biktima mao si Mary Ann Samson Serognas, 19, dalaga nga taga Agtugop, samtang ang suspek mao si Levy Baya Lacaba, 19, nga silingan ra usab sa biktima.

Base sa imbistigasyon nga gihimo ni PO2 Jose Montesclaros sa Asturias Police Station, nasayran nga ang biktima ug ang suspek kauban sa ilang mga barkada naglakaw nga namauli sa ilang balay gikan sa disko.

Apan gumikan kay hubog ang suspek giingong nagkalalis kini ug ang biktima.

Matud pa ni PO2 Montesclaros nga ang lalis naggumikan sa pagselos sa suspetsado kay ang iyang uyab gipanguyaban kuno sa barkada sa biktima.Sa kapungot sa suspek, giluthang sa iyang .38 kalibreng revolver ang barkada sa biktima, apan gumikan malagmit kay walay praktis, imbis barkada ang maigo, didto motaroy ang bala sa walang paa sa biktima.

Gidala dayon ngadto sa Balamban District Hospital ang biktima samtang ang suspetsado nasikop usab dayon sa kapolisan ug nagpahayahay na karon sa prisohan sa kapolisan sa

Asturias.