Babayeng pusher og shabu tiklo

CEBU, Philippines - Nasakmit sa kapolisan ang 10 ka paketeng shabu ug mga kahimanan sa paggamit niini gikan sa usa ka babaye nga gikatahapang pusher dihang gironda ang iyang panimalay sa eskina sa dalan Mabini ug Lapulapu sa barangay Poblacion, dakbayan sa Danao kagahapon sa alas 10:30 ang takna sa buntag.

Ang nadakpan nila ni Chief Inspector Eddie Recamara, hepe sa Danao City Police Station mao si Ruena Tabla Labador, 42, minyo, walay trabaho nga molupyo sa maong dapit.

Si SPO2 Luis Perales sa kapolisan sa maong dakbayan nga nahinabi sa Banat News miingon nga ang ronda nga gilusad nila ni Chief Inspector Recamara gisandig sa Search Warrant nga giluwatan ni Judge Marilyn Lagura Yap sa Branch 28 sa Regional Trial Court (RTC) 7 nga nagbase sa dakbayan sa Mandaue.

Hinuon si SPO2 Perales nagkanayon nga sa wala pa ang ronda mipahigayon una sila si Inspector Recamara og buy bust operation uban sa usa ka police decoy nga nagpakaaron-ingnon nga mopalit og shabu.

Dugang pa niya nga unang gitunol sa maong suspetsado ang duha ka pakete nga shabu ug gibayran og P200 nga minarkahang salapi.

Dungan sa pagdawat sa shabu, gihatag usab dayon sa police decoy ang minarkahang bayad uban sa pagposas sa suspetsado.

Misuway kini og kisi-kisi apan wala na siya makaikyas tungod kay misaka ang kapolisan sa iyang balay ug gisiksik ang mga suok subay sa search warrant nga giluwatan ni Judge Marilyn Yap.

Didto sa sulod sa balay nakakuha pa ang mga otoridad og laing walo pa ka laing pakete sa shabu, mga kahimanan sa paggamit niini ug cell phone.

Gibalhog karon sa prisohan sa kapolisan ang maong dinakpan ug gitakdang pasakaan karong Lunes og kaso nga may labot sa paglapas sa Republic Act 9165 kon Comprehensive Dangerous Drug Act of 2002. (BANAT NEWS)