2 gunmen nakigpinusilay, nadakpan
CEBU, Philippines — Wala pa maabti og 24 oras ang pagpangita sa kapulisan sa duha ka suspek sa pagpamusil-patay sa Barangay Basak Pardo, Cebu City kay nasikop dayun sila sa gilusad nga hot pursuit operation Miyerkules sa hapon, Nobyembre 11, 2026.
Nadakpan ang duha nga sila si Ritchie, 24; ug Kobe, 26 sa Sitio All Season 3, Barangay Cogon Pardo.
Apan una pa silang duha nadakpan, gikatahong nakigpinusilay pa sila sa mga polis, maayo nalang nga walay nangaigo sa binayloay sa bala. Ang mga suspek nagkalapok-lapok tungod sa dapit diin sila nanagi.
Gipangulohan ang operasyon sa mga sakop sa Police Station 7, kauban ang Criminal Investigation and Detection Unit, City Mobile Force Company ug Tactical Motorcycle Riding Unit.
Narekober gikan sa mga nadakpan ang usa ka kalibre .22 nga rebolber nga adunay upat ka bala ug usa ka kalibre .38 nga rebolber nga adunay tulo ka bala.
Sumala pang Cebu City Police Office Director PCol. Ricky Sumalde nadakpan dayun ang duha tungod sa mga impormasyon nga ilang nadawat bahin sa ilang nahimutangan.
Parte daw kini sa ilang paspas nga aksyon matag dunay krimen nga nahitabo sa siyudad ilabina kun kaluwasan sa katawhan ang nakataya.
Kahinumdoman nga patay diha-diha sa pagpamusil ang biktimang si Reian John Cortes Jimenez, 32-anyos, residente sa Sitio Janssen, Barangay Basak San Nicolas, Cebu City. Atol sa pag-hiling sa patay’ng lawas sa biktima, narekober usab ang 15 ka pakete sa gituohang shabu.
Padayon pang gipalawman sa kapulisan ang imbestigasyon aron matino ang tibuok hinungdan sa krimen ug ang posibleng motibo niini kung may kalabotan ba ang insidente sa illegal nga drugas. (BANAT NEWS)
- Latest
