PRO-7 duna nay bag-ong director
CEBU, Philippines — Duna nay bag-ong director sa Police Regional Office 7 (PRO7) nga ubos na karon sa liderato ni Police Brigadier General Rogelio Z Raymundo, Jr. human sa Turnover of Office Ceremony kagahapon, Nobiyembre 12, 2026, sa PRO7 Headquarters, Camp Sergio Osmeña Sr., Cebu City.
Wala makatambong si Philippine National Police Chief, Police General Jose Melencio C Nartatez Jr. sa turnover ceremony apan girepresentahan siya ni Police Lieutenant General Wilson Joseph Lopez, Acting Deputy Chief, PNP for Administration kinsa mao say nagsilbing presiding officer sa seremonya.
Gipulihan ni Raymundo si PBGen. Arnold E Abad kinsa niserbisyo sa PRO7 sugod atong Abril 15 ning tuiga.
Si Raymundo kanhi direktor sa PNP Explosive Ordnance Disposal and Canine Group (EOD/K9 Group) nga usa ka specialized unit sa PNP nga gitahasan may kalabotan sa mga eksplosibo , disposal niini ug canine-assisted law enforcement operations.
Si Abad sa iyang bahin, nagpasalamat sa panahong nakaserbisyo sa Central Visayas, gipasalamatan sab niya ang kapolisan sa PRO-7 nga nihimo sa ilang trabaho isip mga polis.
Lakip sa iyang gipasalamatan si Presidente Ferdinand Marcos Jr. ug si Interior Secretary Jonvic Remulla , PNP Chief Nartatez ug ang komunidad sa Central Visayas sa pagsalig kaniya pagdumala sa PRO-7.
Dili na bag-o dinhi sa Central Visayas si Raymundo tungod kay nadestino na siya kaniadto sa Negros Oriental sa dihang ubos pa ang probinsya sa PRO7.
Matud pa niya, sa Negros niya nakat-onan ang importansya maayong relasyon sa kapolisan ngadto sa komunidad.
Nanawagan siya sa mga ginsakupan nga kinahanglang ipatigbabaw nilang tanan ang tinuoray nga panerbisyo para sa kaayohan sa tanan ilabi na ang paningkamot nga magpabilin ang pagsalig sa publiko sa ilang mga polis. — IBM (BANAT NEWS)
- Latest
