DepEd Mandaue nipatuman sa 4H

CEBU, Philippines — Ang mga division sa Department of Education (DepEd) sa mga dakbayan sa Mandaue ug Lapu-Lapu nagsugod na sa pagpatuman og mga lakang aron mapanalipdan ang mga estudyante batok sa grabeng kainit samtang nagpadayon ang epekto sa El Niño sa nasud.

Sa Dakbayan sa Mandaue, gipatuman sa DepEd division ang 4H guidelines nga nagpasabot sa Hayo, Hinay, Hinga ug Hinto sa tanang eskwelahan sa siyudad.

Si Dr. Edgar Espina, DepEd Mandaue administrative officer nagkanayon nga gisunod nila ang mga lakang subay sa mando sa DepEd Central Office aron masiguro ang kaluwasan ug kaayohan sa mga estudyante taliwala sa pagsaka sa temperatura.

Gipasabot ni Espina nga ang “Hayo” (manageable conditions) ipatuman kon ubos sa 27 degrees Celsius ang heat index.

Ubos niini, mahimong ipadayon ang regular nga face-to-face classes apan kinahanglang hatagan og panahon ang mga estudyante sa pag-inom og tubig.

Samtang ang “Hinay” (caution) ipatuman kon mokabat sa 27 ngadto sa 32 degrees Celsius ang heat index.

 Ubos niini, mahimong mub-an ang oras sa klase o usbon ang schedule aron sa mas bugnaw nga mga oras sa adlaw ipahigayon ang pag-eskwela.

Matud ni Espina nga gipatuman na sa mga eskwelahan sa Mandaue ang Hinay guidelines sa niaging mga semana diin ang mga klase sa buntag gipahigayon gikan alas 6:00 hangtud sa alas 9:00 sa buntag, samtang ang mga klase sa hapon gikan alas 3:00 hangtud alas 6:00 sa gabii.

Giklaro ni Espina nga human sa giusab nga oras sa klase hatagan ang mga estudyante og mga buluhaton nga ilang humanon sa ilang panimalay.

Samtang ang “Hinga” (extreme condition) ipatuman kon moabot sa 33 ngadto sa 41 degrees Celsius ang heat index.

Ubos niini, suspendihon ang face-to-face classes ug hatagan na lang ang mga estudyante og mga buluhaton nga ilang mahimo sa balay.

Ang “Hinto” (danger and extreme danger), sa laing bahin, ipatuman kon moabot sa 42 degrees Celsius pataas ang heat index.

 Niining kahimtanga, suspendihon ang mga klase ug walay dugang nga mga buluhaton nga ipahimo sa mga estudyante sa ilang panimalay.

Gibutyag ni Espina nga sukad niining buwana nakapatuman na ang mga eskwelahan sa Mandaue sa Hayo, Hinay ug Hinga nga mga klasipikasyon tungod kay nagkalahi ang heat index depende sa palibot ug nahimutangan sa matag eskwelahan.

Samtang, nakigtambayayong usab ang DepEd Lapu-Lapu City Division sa lokal nga pangagamhanan aron maghimo og mga lakang sa pagsuspenso sa face-to-face classes panahon sa grabeng kainit lakip na ang pagpatuman sa 4H guidelines. (BANAT NEWS)