Karne gisakmit

CEBU, Philippines - Gisakmit sa mga otoridad sa dakbayan sa Mandaue ang mga karneng giihaw   sa gawas sa ihawang iya sa kagamhanan   nga   gilay-ag na sa lamesa aron ibaligya ngadto sa publiko didto sa merkado publiko sa maong dakbayan niadtong adlaw sa Pasko, Disyembre 25, 2010.

Ang nanakmit sa maong mga karne mao ang team nga iya sa buhatan sa city veterinarian ug sa public market administrator sa Mandaue. Si Dr. Daisy Penetrante nga maoy city vetenarian sa Mandaue ug Mandaue City Public Market Administrator Cesar Mercadal maoy naghiusa sa ilang puwersa sa pagpanakmit sa maong mga karne nga diha na sa ilang mga lamesa aron ibaligya ngadto sa publiko sulod sa merkado sa dakbayan.

Lakip sa ilang gisakmit nga karne mao ang duha ka ulo sa baboy nga mitimbang og 30 ka kilo nga gipanag-iya ni Nora Herona sa barangay Bacayan sa lungsod sa Talamban sa dakbayan sa Sugbo.

Gawas niini nasakmit usab ang 28 ka kilo nga karneng baboy gihapon nga gipanag-iya ni Roy Villardal.

Ang maong pagpanakmit sa maong mga karne gibase nila ni Dr. Penetrante sa ordinansa sa dakbayan nga nagdili sa publiko sa pagpalit sa mga karneng dili inihaw sa ihawan nga gipadagan sa kagamhanan nga nahimutang   sa barangay Labogon sa maong dakbayan.

Sa miaging bulan, ang buhatan sa city vetenarian nakasakmit sa usa ka inasal nga baboy   human masuta nga inihaw kini sa ihawan nga dili iya sa kagamhanan. (BANAT NEWS)