Programa gilusad aron moabag sa LGU pagkuha og pundo

CEBU, Philippines — Gilusad sa national government ang Sustainable Communities Onboarding for Resilience Enhancement (SCORE) program aron mapadali ang pag-access sa mga local government unit (LGU) sa pondo ug teknikal nga tabang alang sa disaster preparedness, climate change adaptation ug recovery. Matud ni Secretary Christina Garcia-Frasco, Presidential Adviser for Sustainable and Resilient Communities, sa paglusad sa programa sa Radisson Blu Cebu kagahapon, Nobiyembre 10, gitumong sa SCORE nga mahimong tulay tali sa national ug local governments, ilabi na panahon sa kalamidad.

Pinaagi niini, matabangan ang mga LGU sa pag-ila sa mga available nga financing facilities, pagsabot sa mga kinahanglanon sa aplikasyon ug pag-andam sa mga proyekto nga makatubag sa panginahanglan sa ilang mga komunidad.

Giklaro ni Frasco nga importante ang maong inisyatiba alang sa Cebu nga nakasinati sa sunod-sunod nga kalamidad.

Samtang, gipasalig ni Office of the Presidential Assistant for the Visayas (OPAV) Undersecretary Glaiza Vicente-Delos Reyes nga motabang ang ilang opisina sa pagdugtong sa mga LGU ngadto sa mga national agencies ug financial institutions nga makahatag og pondo ug teknikal nga suporta.

Gidasig niya ang mga government financial institutions nga hatagan og mas klaro ug praktikal nga giya ang mga LGU sa loan applications ug dokumentasyon aron malikayan ang dugay nga proseso sa pagkuha og pondo.

Gipasalig sa OPAV nga makigtambayayong kini sa Office of the Presidential Adviser for Sustainable and Resilient Communities (OPASRC) aron mapalapad ang SCORE sa tibuok Visayas. MEL BANAT NEWS