200 ka power projects gipaspasan sa DOE

CEBU, Philippines — Gipaspasan sa Department of Energy (DOE) ang pagpatuman sa 200 ka power projects ug mopadala og dugang power barges nga adunay kinatibuk-ang kapasidad nga kapin sa 200 megawatts (MW) sa Visayas aron malikayan ang grabeng epekto sa El Niño sa suplay sa kuryente.

Matud ni DOE Secretary Sharon Garin atol sa virtual press conference niadtong Lunes, Nobiyembre 10, 2026 gilaoman sa Philippine Atmospheric, Geophysical and Astronomical Services Administration (PAGASA) nga mograbe pa ang El Niño ug magpabiling kusog hangtud sa tunga-tunga sa 2027.

 Gilaoman nga mokunhod og labing menos 60 porsiyento ang produksiyon sa mga hydropower plant tungod sa pagkunhod sa tubig samtang motaas ang konsumo sa kuryente tungod sa mas init nga panahon. Ubos sa Task Force 200, gipadali sa DOE ang pagkompleto sa 200 ka power projects diin hangtud sa Oktubre 26, 2026 nakompleto na ang 55 niini lakip ang mga battery energy storage projects.

Alang sa Visayas, gimandoan sa DOE ang National Electrification Administration (NEA) nga paspason ang pagkuha og dugang suplay sa kuryente pinaagi sa power barges sa Bohol, Guimaras, Cebu ug ubang lugar diin gilaoman nga molapas sa 200 MW ang dugang kapasidad niini.

Nakigtambayayong usab ang DOE sa National Grid Corporation of the Philippines (NGCP) alang sa pag-deploy sa 267 MW nga battery energy storage systems sa Visayas.

Matud ni Garin nga adunay 49 porsiyento nga renewable energy share ang Visayas kompara sa 19 porsiyento sa Luzon.

Gipahimangnoan usab sa DOE ang mga electric cooperative nga andamon ang ilang emergency response organizations ug contingency measures aron masiguro ang padayong serbisyo panahon sa kakulang sa suplay. Ubos sa Department Circular No. DC2026-0114, gikinahanglan sa mga sakop nga pasilidad nga adunay magamit nga backup power systems nga makasuporta sa ilang operasyon sulod sa labing menos 72 oras.  BDB BANAT NEWS