Minero nahunlakan, patay

CEBU, Philippines - Patay ang usa ka minero human mahunlak ang yuta nga gituohang mihumok tungod sa pagpunay og uwan-uwan ug didto mitabon niya samtang siya nagtrabaho niadtong tungora ilawom sa yuta sa usa ka coal mine didto sa bukirang bahin sa sitio Portland, barangay Kahumayan, siyudad sa Danao alas 10 sa milabay’ng gabii.

Ang minero mao si Celso Damiles Perez, 31, molupyo sa nahisgutang lugar ug minero sa Cerry Mining Corporation.

Matud ni SPO4 Edgar Gomez sa Danao City Police Station sa dihang nahinabi sa Banat News subay sa inisyal nga imbestigasyon nga si Perez nagtrabaho ilawom sa minahan niadtong tungora sa dihang kalit lang nahugno ang portion sa yuta sa ibabaw nga bahin ug mitabon niya.

Daling gitabang sa mga kauban ang biktima ug gihatod sa Danao City District Hospital apan gideklarar nga dead on arrival.

Gituohan nga ang nasinati nga mga pag-uwan-uwan maoy hinungdan sa pagkahumok sa yuta hinungdan sa pagkahunlak niini.

Niadtong milabay’ng bulan laing tulo ka mga minero ang patay sa dihang naputol ang higot nga puthaw nga ilang gisakyan pagkanaog sa ilawom nga bahin sa minahan didto sa barangay Lawaan, bukirang bahin gihapon sa Danao. - BANAT NEWS