Ancero rilibohan

CEBU, Philippines - Rilibohan karong adlawa ang usa ka polis sa Medellin Police Station nga mipagawas sa usa ka piniriso nga walay court order.

Siya mao si SPO3 Jose Ancero sakop sa Alert Team sa Medellin kinsa niadto lang miaging semana hibaw-i sa iyang gihimo dihang mireklamo ang tagtungod sa gipatay sa tawong gipagawas ni Ancero gikan sa karsel.

Si Ancero anha na ibalhin sa Provincial Investigation and Detective Management Branch (PIDMB) sa Cebu Provincial Police Office (CPPO).

Si Sr. Supt. Erson Digal, hepe sa kapolisan sa lalawigan nagkanayon nga may kalapasang nahimo si Ancero tungod sa iyang pagpagawas sa pinirisong si Kim Imvento.

Si Imvento nadakpan niadtong miaging buwan human kini itumbok nga maoy mipusil patay kang Francisco Codiera niadtong Mayo 8, duha ka adlaw sa wala pa ang eleksyon niadtong Mayo 10.

Unya giingong gipagawas ni Ancero si Imvento nianang pagka Mayo 22.

Kini tungod kay sumala sa taho , si Imvento mihangyo kuno kang Ancero nga mopauli siya sa ilang balay sa Poblacion kay gisakitan sa tiyan ug mopalit siya og tambal.

Si Ancero misugot ra usab ug gani iya pa kining gihatod sakay sa motorsiklo ngadto sa ilang balay.

Apan nakit-an sa mga kabanay sa biktima nga nag-angkas sa motorsiklo ni Ancero ang suspek hinungdan nga mihiwasa kini sa kasuko ug mireklamo ngadto sa pangulo sa kapolisan sa lalawigan.

Matud ni Digal dako kaayong lapso ang nahimo ni Ancero tungod sa pagpagawas niya sa usa ka piniriso nga walay court order.

 Tungod niini, matud ni Digal nga mahilakip ang hepe nga si Sr. Insp. Bonifacio Arresgado sa imbestigasyon gumikan sa iyang command responsibility.   (BANATNEWS)