Mayor Tom moabot karong adlawa

CEBU, Philippines – Gitakda na nga mahiabot karong adlawa si Cebu City Mayor Tomas Osmeña human sa iyang malampusong pagpaubos sa operasyon didto sa Estados Unidos.

Matud pa ni City Administrator Bimbo Fernandez nga ang giluwanan sa mayor nga Cathay Pacific gipaabot nga motugpa sa Mactan airport karong alas 11:30 sa buntag.

Nagkanayon si Fernandez nga si Osmeña modiretso unya sa panimalay niini diha sa barangay Guadalupe alang sa pipila ka oras nga pagpahuway.

Alas 3:00 karong hapon ang mayor moduaw sa City Hall aron mopahigayon sa iyang press conference ug mosunod ang usa ka Santos nga Misa.

Gioperahan ang mayor human ma-diagnose sa hinapos nga bahin niadtong miaging tuig nga kini dunay urinary bladder cancer.

Matud pa ni Fernandez nga moasumir gilayon ang mayor sa iyang gibiyaan nga katungdanan sa pag-abot dinhi sa siyudad karong adlawa.

“Balik siya sa iyang normal nga trabaho, although the next few days mopahuway una siya, dili pud mi allowed nga muhimo sa iyang schedule,” matud ni Fernandez.

Sa pikas bahin, monitoron usab sa Department of Health (DOH-7) ang paghiabot ni Osmeña dinhi sa Sugbu sulod sa mosunod nga mga adlaw tungod sa sakit nga Influenza A (H1N1) flu virus.

Matud pa ni DOH-7 Director Doctor Susana Madarietta nga ilang obserbahan ang mayor kung kini dili ba mopakita og mga sintomas sa maong virus.

Midugang si Madarietta nga kung dili makasinati ang mayor og pag-ubo, hilanat ug uban pa sulod sa napulo ka adlaw, kini mahimo ra nga mopadayon sa iyang mga gimbuhaton. - Elly Bolonos (BANAT NEWS)