Lalake giluba sa iyang silingan didto sa Suba

CEBU, Philippines – Samdan ang usa ka lalaki human unaya og dunggab sa iyang silingan didto sa sitio Santo Niño, barangay Suba, ning dakbayan sa Sugbo , kagahapon pasado alas 3:00 sa kaadlawon.

Si PO3 Henry Orbiso sa Cebu City Police Office, miila sa biktima nga si   Michael Abellana,27, nga taga sitio Magsaysay, barangay Suba , samtang ang suspetsado mao usab si Many Baredo,25, nga taga sitio Missionaries sa mao gihapong barangay.

Si Desiree Cadungog , usa sa mga kainom sa biktima, mibutyag sa kapolisan gikainom sa biktima ang mga higala niining babaye didto sa balay sa iyang iyaan nga si Amy Cadungog sa Santo Niño.

Apan pagkahuman nila og inom mipauli na ang biktima dihang sa paggawas niya sa balay sa iyang iyaan giatangan siya sa suspetsado ug sa walay igong hinungdan giluba ang biktima.

Ang biktima kinsa wala makabantay ug walay naantiguhang paagi sa pagdepensa sa kaugalingon natusak sa samad sa kutsilyo ang kalawasan.

Matud pa ni PO3 Orbiso nga padayon pa nilang gipangita karon ang suspetsado human kini molayas gikan sa ilang lugar.

Hinuon nasalbar ang biktima kay nadali kini sa paghatod ngadto sa Cebu City Medical Center.