Polis nga 'Vigilante' gipasakaan sa CHR-7

CEBU, Philippines – Mipasaka na og kasong attempted murder ang Commission on Human Right (CHR-7) batok sa kontrobersiyal nga polis sa Pardo Police Station tungod sa pagsulay sa pagpusil patay sa gituohang lalaki nga gitumbok nga biktima sa vigilantes.

Si CHR-7 regional director Alejandro Alonso Jr. mipasaka og kaso batok kang SPO4 Sanrico Jolejole nga nadestino sa Pardo Police Station tungod sa pagsulay og pagpusil patay sa usa ka Reynaldo Sabellano, hingkod ang panuigon, residente sa dalan Tabora   Pardo, ning dakbayan.

Segun pa sa gipirmahan nga resolusyon ni Alonso nga namatud-an sa imbestigasyon nga gipasiugdahan ni Atty. Arvin Odron nga sad-an gyud si SPO4 Jolejole sa paggukod ug pagpusil sa biktima nga si Sabellano.

Nasayran nga niadtong Agusto 21, 2007, si Sabellano uban ni Senon Tabora misakay og PUJ apan iyang nabantayan nga nagsunod-sunod kanila si SPO4 Jolejole sakay sa iyang motosiklo uban usab sa iyang mga ‘asset’ hinungdan nga mikanaog sila ug misakay og laing sakyanan ug mikanaog sa peryahan nalipat ang polis.

 Sa Oktobre 2008, samtang natulog si Sabellano sa ilang balay nakabati siya og sunudsunod nga pitik sa mikagar nga armas ug sa iyang pagmata nakita niya ang duha ka mga tawo nga nagtabon sa ilang nawong nga nagtion pa og armas tumong sa ilang ulo ug nikalit og dagan dihang nangayo na siya og panabang sa dihang gitangtang na ang tabon sa nawong sa duha iyang nailhan ang usa nga mao si SPO4 Jolejole.

 Sa Enero 11, 2007, si Sabellano kuyog gihapon ni Tabora ug laing duha ka mga kaubanan nag-atang og PUJ nga masakyan sa may Greenfields Subdivision sa may Pardo, ug kalit lamang mibutho si SPO4 Jolejole sakay gihapon sa iyang motorsiklo uban ang iyang mga police assets nga nagsakay usab og motor. Kalit lamang nga mipusil si SPO4 Jolejole ug kauban niini makadaghang higayon ngadto kang Sabellano kinsa nag-ikis-ikis sa pagdagan hinungdan nga naigo ang iyang tiil apan nakatago pa kini sa lapukon nga kangkongan. Ang pamahayag ni Sabellano gisuportahan usab kini ni Tabora ug nila ni Claudio Agan ug Jonathan Villegas.

Si Director Alonso wala mihatag og gibug-aton sa mga panghimakak sa polis tungod sa dili matuis nga positibong pag-identify sa biktima ni SPO4 Jolejole nga maoy mipusil kaniya.

Ang maong kaso nahandos na karon sa Cebu City Prosecutor’s Office. - Chester Abadilla (BANAT NEWS)