Meat handlers gipaubos og seminar sa DVMF

CEBU, Philippines — Magpahigayon ang Cebu City Department of Veterinary Medicine and Fisheries (DVMF) og mandatory seminar alang sa meat handlers ug uban pa’ng indibidwal nga nalambigit sa pagbaligya ug pagproseso sa karne sa siyudad.

Ang seminar adunay tema nga “Hygienic Handling of Meat in Meat Markets” nga ipahigayon karong Oktubre 20, 2026, gikan alas 8:30 sa buntag hangtud sa alas 11:00 sa buntag sa DMDP Training Room, Ground Floor, Ramos Public Market Building sa Echavez Extension corner D. Jakosalem Street, Cogon Ramos niining siyudad.

Giawhag sa DVMF ang mandatory nga pagtambong sa mga stakeholder nga nalambigit sa industriya sa karne.

Lakip sa giawhag nga motambong ang meat handlers ug butchers, meat stall holders, meat shops, meat dealers ug suppliers, meat processors, lechon dealers ug mamaligyaay og karne.

Giawhag usab sa DVMF ang tanang partisipante nga moabot sa hustong oras ug aktibong moapil sa seminar aron makasubay kong unsaon nga mapalambo ang hustong pagdumala, pagtipig, pagproseso ug pagbaligya sa karne ug aron nga masiguro nga ang mga produkto nga mapalit sa publiko luwas, limpiyo ug napaubos og husto nga sanitary inspection.

Samtang, niadtong Oktubre 6, 2026 nagsugod na ang DVMF sa pagpahigayon og seminar sa “Hygienic Handling of Meat in Meat Markets” alang sa mga meat handlers sa Barangay Toong, Pamutan ug Buhisan.

Gipahigayon ang maong kalihokan diha sa Barangay Toong Conference Area.

Gihatagan usab og briefing ang mga partisipante kalabot sa hygienic practices gikan sa pag-ihaw sa hayop hangtud sa pagbaligya, hustong pagtipig sa karne, personal hygiene, ug pagsunod sa kasamtangang mga regulasyon sa meat inspection.

Ang maong lakang kabahin kini sa padayong paningkamot sa siyudad sa pagpalig-on sa food safety ug pagpatuman og mga sumbanan sa hustong pagdumala sa karne sa mga merkado sa tibuok siyudad. BDB BANAT NEWS