Kanhi tigpaluyo ni Jonas gikulata

Gialegar sa nangangkon nga kanhi tigpaluyo ni Konsehal Jonas Cortes nga biktima sa pagpanukmag ug pagpanion og armas uban ang paghulga nga pusilon ni kanhi Bise Mayor Demetrio Cortes Jr.

Ang biktima mao si Nestor Figrua Torrefranca, hingkod ang panuigon ug nagpailang regional director sa Bohol’s Pride Club sa Central Visayas nga nagrepresentar sa barangay Tabok sa Cortes "Manpride" nga kahugpongan sa mga bayot sa maong dakbayan.

Si Torrefranca miingon nga nasuko ang kanhi bise mayor dihang gipahibalo niya ang iyang hukom sa pagbiya sa iyang pagsuporta sa kandidatura sa pagka-mayor ni Jonas.

Giangkon ni Torrefranca nga ang maong pundok nga gitawag og All Mandauehanon-Bol-anon Sectoral Group nga gilangkuban sa Mandaue PTCA nga pundok, Mandaue Homeowners Association, Mandaue Chamber of Commerce and Industry, urban poor groups ug uban pa mokabat sa 4,000 ngadto sa 5,000 nga gidaghanon sa mga sakop.

Base sa alegasyon ni Torrefranca nga gidala siya sa sulod sa panimalay sa kanhi bise mayor kinsa nagtaptap og panapton sa nawong ug gipawong pa ang suga dayong sukmag kaniya ug gitionan sa armas.

"Naa siya sa sud sa ilang balay sa dihang iyaha kong gitionan sa armas unya iya man gipawong ang suga. Nagbutang siya og panapton sa iyang nawong."

Hugtanon kining gipanghimakak ni kanhi bise mayor Cortes dihang gikahinabi sa mga tigbalita ug mihagit kang Torrefranca sa pagpasaka og kaso sa korte sanglit dili na kini bag-o ang maong mga intriga alang kaniya.

Si Torrefranca mialegar nga biktima siya sa pagkulata sa wala mailhing mga tawo nga magsakay og motorsiklo sa dalan A.S. Fortuna sa atubangan sa Norkis sa Bakilid niadtong Marso 15 sa gabii.

Nagpatambal siya sa Cortes General Hospital ug gipasaligan nga tabangan kun ipasangil nga gikulata kini sa mga tawo ni Mayor Ouano nga maoy nagkulata kaniya nga maoy nakaingon sa iyang hukom sa pagbiya.