2 ka magsuong lola gi-martilyo

Duha ka magsuong babayeng tiguwang ang gipangmartilyo sa ilang silingang lalaki gumikan kay gipasanginlan silang maoy nagpasiugda'g tabi-tabi sa kasilinganan diha sa sitio Langub sa Guadalupe niadtong milabay'ng Lunes sa hapon.



Ang mga biktima nga nadangat sa Cebu City Medical Center giilang sila si Magdalena Ibon, 74, ug Felicidad Ibon, pulos mga dalaga ug residente sa maong lugar.

Usa ka Jonathan Martinez, nga ilang silingan ang gitumbok sa duha nga maoy mimartilyo kanila diha sulod sa ilang tindahan.

Matud pang SPO3 Francisco Delica, imbestigador sa Guadalupe police station nga miimbestigar sa maong kaso sa pakighinabi sa Banat News nga sayo pa nianang adlawa nag-inom ang suspek ug igsuon niining giilang si Joel Martinez diha sa ilang balay.



Nianang pagkahapon gikatahong miadto si Joel sa ilang tindahan sa mga biktima ug nagpadungog-dungog ug mipasangil kanilang magsuon nga maoy nagpasiugda og tabitabi diha sa ilang mga silingan kabahin sa ilang pagpuyo sa maong dapit, asoy pang Delica.

Human niadto milakaw si Joel balik sa ilang balay ug dangtan pila ka gutlo si Jonathan maoy mibalik sa tindahan sa mga biktima ug gitukmod ang lamesa sa ilang gipaninda hinungdan sa pagkayabo niini.

Sumala pang Delica wala pa matagbaw ang suspek gikatahong misulod kini sa tindahan ug gihapsan og martilyo si Felicidad ug naigo diha sa tiyan maong dali kining midagan agi diha sa pultahan apan sa iyang paglingi ang iyang maguwang nga si Magdalena na usab ang gihapsan og martilyo diha sa kilay maong mibalik kini aron pugngan apan gihapsan siya pag-usab hangtud nga si Felicidad nakaluhod sa kasakit ug gibira sa suspek ang iyang buhok.

Ning tungura mikisi-kisi og maayo si Felicidad hinungdan sa pagkalarot sa iyang buhok ug midagan palayo samtang si Magdalena mikuha og plastic nga bangko, dali usab nga miikyas ang suspek ug nanirado sa ilang balay una pa makaabot ang mga polis.

Ang mga sakop sa Emergency Rescue Unit Foundation na maoy midala sa magsuon sa tambalanan tungod sa naangkong mga bun-og sa ulo ug kalawasan.

Gitun-an karon ni Delica kung unsay kasong ipasaka sa suspek apan posibleng frustrated homicide o ba kaha serious physical injuries ang ikaso batok kang Martinez.