Nanulis sa Anchor bank nailhan na

Nailhan na sa kapolisan ang duha ka suspek sa pagpanulis human gipakitaan sa photo gallery ang mga empleyado sa Anchor Savings Bank ug positibong gitumbok nga maoy responsable sa pagpanulis sa miaging adlaw diha sa dalan Molave corner Archbishop Reyes ning dakbayan.

Mokabat sa P370,000 ang kinatibuk-ang nadala sa duha ka armadong tulisan ang armado og .45 nga pistola.

Si Sr. Supt. Patrocinio Comendador, hepe sa Cebu City Police Office mitug-an sa mga tigbalita nga ang gitumbok nga suspek sa pagpanulis sa maong bangko mao si Doroteo Emperial ug Roldan Villanueva kinsa nagdala og laing pangalan nga Jimrick Cardosa.

Si Emperial ug Villanueva kanhi mga kauban ni Rey Torres kaniadto diin nahitabo ang sunod-sunod nga pagpanulis sa bangko ug lending firm dinhi sa dakbayan.

Sila nalutsan na og warrant of arrest sa kasong pagpanulis dinhi sa dakbayan.

Ang duha nalambigit usab sa tulis sa East West bank samtang si Villanueva gitumbok usab sa tulis sa Yusay Credit Finance Corporation.

Giangkon ni Comendador nga minos gyud ang tulis dinhi sa Sugbo gumikan sa kadaghan sa mga FTP sa milabay'ng tuig nunot sa Asean Summit ug Sinulog.

Matud ni Comendador nga iyang usbon ang pamaagi sa mga beat patrols sa tanang unit sa kapolisan aron mapakgang ang pagpanulis.

Gitumbok ni Comendador nga daghan kaayong kalutsan nga agianan sa mga tulisan ilabi na diha sa dalan Archbishop Reyes diin ang mga establisamento maoy kasagaran maigo sa tulisan.

Karong adlawa gikatakdang makigtagbo si Comendador sa kadagkuan sa Cebu Bankers Association of Cebu aron hatagan og litrato sa tanang mga tulisan aron ila kining matiman-an sa mga empleyado.

Si Chief Supt. Silverio Alarcio Jr. sa iyang bahin mipasidaan ngadto ni Comendador nga kinahanglan mohimo gyud og pamaagi aron dili na masubli ang pagpanulis dinhi sa dakbayan.

Dili buot si Alarcio nga mapun-an og laing ikaunom nga mabiktima sa tulisan.

Wala hinuon giklaro ni Alarcio kun ugaling mahitabo nga dunay laing tulis ubos sa pagdumala ni Comendador kun unsay iyang dangatan apan matud niya mangita lang gyud og pamaagi aron masumpo ang tulis dinhi sa dakbayan.