Tulisan napusilan patay na

Patay ang usa sa duha ka suspetsadong tulisan kinsa napusilan sa mga polis tungod sa pagsuway niini og sukol niadtong Huwebes sa buntag diha sa Sitio Mananga, Tabunok sa Talisay.

Si PO2 Joel Rosales kinsa usa sa mipahigayon og follow-up nga imbestigasyon sa insidente mibutyag kagahapon sa Banat News nga mga alas 3:00 sa hapon niadtong Huwebes namatay si Alvin Timog diha sa Vicente Sotto Medical Memorial Center.

Apan wala ibutyag sa mga polis kun asa dapita sa lawas ni Timog ang mga igo niini sa bala.

Kahinumduman nga si Timog uban ni Lito Oros gipasanginlang mitulis ni Maria Charina Estorba nga estudyante sa nursing sa University of San Jose Recoletos.

Si Timog gipasanginlang midunggab ni Estorba gamit ang usa ka icepick human nagdumili sa paghatag sa iyang bag.

Si Supt. Romeo Perigo, hepe sa kapolisan sa Talisay mibutyag nga si Timog misuway sa pagsukol sa mga polis nga misikop kanila hinungdan nga napusilan kini apan hangtud karon wala pa masikop si Oros.

Si Timog nasakmitan sa mga polis og usa ka .38 kalibreng rebolber nga dunay lima ka buhing bala ug usa ka kabhang ug usa ka tres kantos nga gituhoang maoy gigamit sa pagdunggab niini ngadto ni Estorba.

Kagahapon, sa hapon giduso sa mga polis diha sa Talisay City Prosecutors Office ang kasong attempted robbery, concealing of deadly weapon ug kalapasan sa Comelec gun ban batok nila ni Timog ug Oros.