Suspek pagpatay kang Parilla gikiha

Suspek sa pagpatay kang kanhi Biliran gobernador Danilo Parilla gipasakaan na og kasong murder kagahapon, ang suspek positibo sa paraffin test ug positibo usab nga nakabuto ang iyang armas sumala pa sa kapolisan.

Ang gikasuhan mao si Eugenio Corpin, 56, kinsa maoy gitumbok nga mipusil kang Parilla samtang nanganaog sa usa ka barko gikan sa Biliran niadtong Huwebes sa buntag diha sa Pier 4 ning dakbayan.

Sa gipagawas nga resulta sa paraffin test sa PNP Crime Laboratory mitumaw nga positibo ang duha ka kamot ni Corpin sa gunpowder burns ug positibo usab ang kalibre 45 pistolang nasakmit kaniya sa gun powder residue test.

Si Corpin sa dihang gikahinabi sa mga tigbalita kagahapon subling mihimakak sa pasangil bisan paman sa una na niyang pamahayag sa usa ka lokal nga telebisyon nga iyang gipusil si Parilla aron makabawos.

Matud pang Corpin nga gikulata siya ni Parilla niadtong Septembre 2 diha sa pantalan sa Naval sa walay igong hinungdan.

Ang Criminal Investigation and Detection Group 7 gimandoan usab nga motabang sa imbestigasyon sa kaso aron palawman pa ang pagsusing gihimo sa Cebu City Police Office.

Si Chief Inspector Rex Derilo sa pakighinabi sa Banat News nagkanayon nga gawas sa motibong personal ila usab tinuon ang ubang anggulo apan wala moklaro kun lakip ba niini ang politika.

Si Parilla maoy nahimong kaatbang sa banay'ng Espina sa Biliran sa pwesto sa pagka-gobernador ug pagkamayor sa Naval, si Naval Mayor Gerry Espina daan nang mihimakak sa kalambigitan sa maong kaso ug mitumbok kang Corpin nga maoy dunay dakong motibo aron himuon ang krimen.