Ancajas ‘di nangangamba sa hometown decision
MANILA, Philippines — Hindi ito ang unang pagkakataon na lalaban si Filipino world super flyweight champion Jerwin Ancajas sa labas ng Pilipinas.
Kaya naman hindi iniisip ni Ancajas ang hometown advantage na hawak ni Irish challenger Jamie Conlan sa kanyang pagtatanggol sa suot na International Boxing Federation super flyweight crown ngayon sa SSE Arena sa Belfast, Ireland.
Noong Enero ng 2016 ay dumayo si Ancajas sa Macau, China para talunin si Jose Alfredo Rodriguez via seventh-round technical decision sa Cotai Arena kasunod ang kanyang seventh-round TKO win laban kay Teiru Kinoshita ng Japan noong Hulyo 2 sa Suncorp Stadium sa Brisbane, Australia sa main undercard ng bakbakan nina Manny Pacquiao at Jeff Horn para sa WBO welterweight title.
Ang naturang laban ni Ancajas kay Kinoshita ay personal na napanood ni Conlan.
Ang Ancajas-Conlan title match ay main undercard ng salpukan nina Carl Frampton at Mexican Horacio Garcia.
Nagmula si Frampton sa 12-round majority decision loss kay Leo Sta. Cruz noong Enero kung saan niya naisuko ang suot na World Boxing Association (WBA) super featherweight belt.
Kumpiyansa ang 25-anyos na tubong Panabo, Davao del Norte na si Ancajas na tatalunin niya ang 31-anyos na si Conlan para patuloy na isuot ang kanyang IBF super flyweight crown pabalik ng Pilipinas.
Kasalukuyang bitbit ni Ancajas ang 27-1-1 win-loss-draw ring record tampok ang 18 knockouts laban kay Conlan (19-0-0, 11 KOs).
Si Ancajas ang ikatlong Filipino world champion sa kasalukuyan maliban kina IBF light flyweight ruler Milan Melindo at IBF flyweight titlist Donnie ‘Ahas’ Nietes.
Ito ang ikatlong sunod na pagkakataon na idedepensa ni Ancajas ang kanyang suot na IBF super flyweight crown.
“I can’t really get carried away in this one and I think the kind of style he brings will make me be a lot more tuned in,” sabi ni Conlan.
- Latest
