Apoy sa Balsa (65)

Naganap ang shooting ng TV commercial sa loob ng airconditioned studio nang buksan ng floor director ang cue lights. Nagsimula nang umikot ang tatlong malalaking camera para sa pinakamahalagang romantikong eksena ng TVC, ang eksenang mismong isinulat ni Rhea sa gitna ng kanyang pait at pagmamahal.

Nakatayo si Rhea sa tabi ng director’s booth, katabi ang main monitor, nakasentro ang tingin sa screen.

Sa gitna ng set, suot ni Winona ang isang sexy na cocktail dress. Habang nag-e-ensayo ang mga lighting technicians, mas lalong itinodo ng aktres ang kaniyang karisma. Bago pa man sumigaw ng “action” ang direktor, ipi­nalupot na nito ang kanyang mga braso sa leeg ni Kael, idinikit nang bahagya ang kata­wan sa binata, at nagpakawala ng isang pabulong na tawa habang hinihipan ang taynga nito.

“Ang bango mo, Kael,” marahang pahiwatig ni Winona, may kasamang ma­landing ngiti sa mga labi habang dahan-dahang hinahaplos ang lapel ng blazer ni Kael. “Make sure you look at me like you mean it, okay?”

Si Kael, kahit bakas ang matinding pagkailang, ay na­natiling maayos at propesyonal. Bahagya siyang lumayo nang dalawang pulgada, inalis ang mga kamay ng aktres mula sa kanyang leeg sa paraang tila bahagi ng blocking, at binigyan ito ng isang pormal na tango.

“Action!” sigaw ng direktor.

Dumaloy ang musika sa set. Sinimulan ni Winona ang kanyang mga linya, buong-pusong ginagampanan ang karakter. Lumapit ito kay Kael, ibinuhos ang kanyang pamosong charm sa camera, at marahang inihaplos ang mga daliri sa dibdib ng binata.

Ngunit nang dumating ang eksena kung saan kailangang titigan ni Kael ang kanyang kapa­reha nang may matinding pagnanasa at pagmamahal, ginawa ng binata ang isang bagay na nagpatigil sa tibok ng puso ni Rhea.

Inilagay ni Kael ang kanyang kamay sa mukha ni Winona tulad ng nakasulat sa script. Ngunit ang kanyang mga mata, ang malalalim, tapat, at kumikislap nitong paningin, ay walang buhay na nakatitig sa mukha ng aktres.

“CUT!” sigaw ng direktor.

(Itutuloy)