29 anyos gipusil patay sa discohan sa dumanjug

CEBU, Philippines — Patay ang usa ka 29 anyos nga lalake human kini gipusil sulod sa discohan sa multipurpose gym sa Barangay Bitoon, Lungsod sa Dumanjug, kagahapon sa kadlawon.

Ang biktima mao si Josephus Davis Castillo, residente sa Barangay Salagmaya, Lungsod sa Alcantara.

Sa impormasyon sa Dumanjug Police Station pinangulohan ni Police Captain Jan Ace Elcid Layug alas 3:08 sa kadlawon kagahapon nakadawat sila og tawag gikan sa konsehal sa Barangay Bitoon nga dunay gipusil sulod sa discohan.

Daling niresponde ang kapolisan ug sa ilang pag-abot sa nahitaboan nakit-an ang biktima nga naa sa salog ug naligo sa kaugaling dugo.

Gidala pa sa Barili District Hospital ang biktima apan gideklarar kining dead on arrival gumikan sa naangkon niining samad pinusilan sa liog.

Base sa imbestigasyon ang naka duty nga BPSO adtong higayona nakadungog og buto sa armas ug nakit-an dayon nila ang biktima nga nahagba na sa sawog.

Naistorya sa kapolisan ang mga nakakita sa hitabo ug na-review sab nila ang CCTV footage sa dapit ug didto nahibaw-an nga ang mamumuno nagsul-ob og light brown t-shirt, maong pants ug kalo nga puti ug dali sab kining miikyas human mahimo ang krimen.

Padayon pang gisuta sa Dumanjug Police Station ang hinungdan sa pagpusil patay sa biktima kinsa namiesta lang niadtong higayona. (BANAT NEWS)