Miss Universe Philippines 2022, unang mapapanood sa digital platforms

Sino kaya ang susunod na pambato ng Pilipinas sa 2022 Miss Universe?

Makikilala na ang papasahan ng korona ni Miss Universe Philippines 2021 Beatrice Luigi Gomez sa coronation night nito sa Abril 30, 7 p.m. na mapapanood nang live at free sa digital platforms ng ABS-CBN na iWantTFC at ABS-CBN entertainment YouTube Channel bilang official digital partner ng prestihiyosong pageant.

Masasaksihan ang mga kaganapan sa MOA Arena kasama ang hosts na sina Miss Universe 2015 Pia Wurtzbach, Miss Universe 2016 Iris Mittenaere, at Miss Universe 2017 Demi-Leigh Tebow.

Nauna nang dumating sa bansa si reigning Miss Universe Harnaaz Kaur Sandhu na sinundo ng private plane ni former Governor Chavit Singson sa India.

Kasalukuyan itong nasa Ilocos kasama ang ilan pang kandidata base sa post ng Miss Universe social accounts.

Mapapanood naman ang performances nina Bamboo, Francisco Martin, at Sam Concepcion.

Samantala, may kapangyarihan ang fans kung sino ang gusto nilang hirangin bilang Miss Universe Philippines 2022 bilang panglabing-isang hurado sa final competition ng nasabing pageant sa pagsasanib-puwersa ng Miss Universe Philippines at Lazada. Ang boto na manggagaling sa viewers ay parte sa Official Score ng finalists na basehan sa pagpili ng Top 10, Top 5, at winner.

Yes, maaaring suportahan ang inyong napupusuang kandidata sa pagrampa nila ng kanilang swimsuit at gowns at pagsagot sa Q&A portion sa naturang gabi.

Anyway, si Michelle Dee ng Makati ang lumabas bilang frontrunner sa preliminary competition ng Miss Universe Philippines 2022 pageant, na nag-uwi ng anim na special awards, noong Miyerkules ng gabi.