LJ kinakaya kahit nahihirapan, ipinagdarasal na mapatawad si Paolo

Aming nakapanayam si LJ Reyes sa Amerika noong bumisita kami sa New York kamakailan. Nakabase ngayon doon ang aktres kasama ang dalawang anak. Matatandaang naging kontrobersyal ang hiwalayan nina LJ at Paolo Contis ilang buwan na ang nakalilipas. Aminado ang aktres na nahihirapan pa rin sa kanyang kalagayan ngayon. “I want to be honest, there are days that I find it difficult to… ang hirap nito. Okay, nandito kayo ng mga bata, kailangang kayanin mo. Halos minu-minuto akong nagdadasal. If not, may mga araw na I don’t feel okay. It will be a very long journey, a difficult one pero kumakapit na ako sa Diyos,” pagtatapat ni LJ sa amin.

Umaasa ang aktres na mapapatawad din niya si Paolo sa takdang panahon. “It’s a work in progress. Pinagdadasal ko na mapatawad ko siya. Kasi I know if I don’t forgive him, this very dark emotion will eat me up. I won’t be able to move on with my kids nang maayos. ‘Yung walang galit, may pain, hindi mawawala ‘yon,” makahulugang paglalahad niya.

Samantala, nanatiling magkaibigan naman si LJ at ang ama ng panganay na anak na si Paulo Avelino. Nagpaabot umano ng suporta ang aktor nang mabalitaan ang tungkol sa hiwalayan ng aktres at Paolo Contis. “Nagsabi lang siya na, ‘I know you are going through a very difficult time. Siyempre ang iniisip niya rin si Aki (anak nina LJ at Paulo). And if anything daw that I need, when it comes to Aki, I can always tell him,” pagtatapat ng aktres.

Marco, aprubado ni Jake sa maiinit na eksena kay Kylie

Mayroong mga mapangahas na eksena sina Kylie Verzosa at Marco Gumabao sa pelikulang My Husband, My Lover. Kaibigan ng aktor ang kasintahan ng dalaga na si Jake Cuenca kaya nagpaalam pa umano si Marco bago gawin ang maiinit nilang eksena ng aktres. “Kinabahan ako kasi very big ang requirements for the character at sa mga eksenang gagawin namin. Nagpaalam ako kay Jake. Kapatid ko si Jake sa Los Bastardos and even after Los Bastardos, kapatid ko pa rin siya off cam. Minsan lumalabas kami ni Jake with Kylie/ Ako ‘yung laging third wheel nila. I had to ask him for his blessing. Kasi kahit sabihin nating trabaho lang ‘to, as a gentleman and as a brother to him, tinext ko siya,” kwento ni Marco.

Wala naman daw naging problema sa panig ni Jake at sa halip ay pinayuhan lamang si Marco na galingan sa mga gagawing eksena. “Sabi niya, ‘Bro, you have my blessing, galingan n’yo.’ Sobrang laking tulong sa akin no’n. Kasi siyempre sa mga eksena namin, talagang maiinit. I needed that go signal from Jake para matodo namin ‘yung mga eksena,” pagbabahagi ng aktor.

(Reports from JCC)