Masuso nalumos sa drum

CEBU, Philippines —  Kapin usa ka tuig nga batang masuso ang nalumos sud sa drum sa tubig diha sa ilang balay diha sa Upper Kamagayan, Barangay Perrelos, sa Dakbayan sa Carcar niadtong Domingo sa hapon.

Ang nakalas naila nga si Kaylee Erica Gaviola, usa ka tuig og lima ka buwan. Matud pa ni Police Corporal Renante Dayuja, Desk Officer sa Carcar City Police Station nga nakahinabi sa Banat News nidangop sa ilang buhatan si Anita Gaviola, iyaan sa bata aron sa pagtaho sa nahitabo.

Base sa pagsusi sa mga imbestigador ang mama sa bata bag-o pang naabot sa balay ug maoy nakakita sa iyang anak diha sa sulod sa drum nga giingong adunay tubig.

Wala na maglihok ug magginhawa ang bata ug dali kini nilang gitabang ug gidala sa tambalanan apan didto kini gideklarar sa mga doktor nga dead on arrival.

Sumala pa ni Dayuja, giingong nakatulog ang amahan sa bata nga giingong nagbantay niini. Ayha lang kini napugwat sa pagkatulog sa dihang gipahibalo sa nahitabo sa ilang anak ug nitabang pagdala sa anak sa tambalanan.

Dugang pa ni Dayuja, mohimo pa ug imbestigasyon ang kapulisan kung aduna ba tulobagon alang sa kamatayon sa bata ang mga ginikanan ug lakip ang pagpahigayon ug autopsy kung wala bay foul play ang kamatayon sa bata.

Pipila ka tuig na ang nakalabay, usa sab ka masuso ang nalumos sa usa ka baldeng tubig nga nataligam-an sa inahan diha sa ilang banyo.

Ang kapolisan mipahimangno sa mga ginikanan o sa mga nahibilin sa mga panimalay nga dunay mga gagmay nga mga batang magkaba-kaba na sa paglakaw nga dili gyud mokompiyansa bisan sa balde sa tubig. Tungod kay duwaan kini sa mga masuso ug makaingon nga matikwang sa sud ug malumos tungod sa ilang gigamayon. IBM (BANATNEWS)