Matteo ug Regine nag-duet

CEBU, Philippines - Usa sa mga unod sa umaabot nga album ni Matteo Guidicelli mao ang awit nga Pangako kung diin nag-duet sila ni Regine Velasquez.  Ang bana ni Regine nga si Ogie Alcasid maoy nagama sa maong awit. Walo ka mga kanta ang unod sa album ni Matteo.  Wala’y partisipasyon sa maong album ang uyab ni Matteo nga si Sarah Geronimo.

Marjorie magminaldita

Kontrabida ang role ni Marjorie Barretto sa bag-ong serye sa TV5 nga My Fair Lady. Siya maoy mopaugtas sa bida sa maong serye nga si Jasmine Curtis Smith. Taud-taud na nga nipahuway si Marjorie sa pag-arte busa nabag-ohan siya atol sa taping niini.

Proyekto gibalibaran ni Pauleen

Gikatahong busy na si Pauleen Luna sa pagpangandam sa plano nila nga pagpakasal ni Vic Sotto busa duna’y mga proyekto nga iyang gibalibaran. Sa Disyembre ipahigayon ang kasal sa duha pinaagi sa pribadong seremonya.

Uyab ni Michael mabdos

Miangkon ang singer ug Your Face Sounds Familiar Season 2 contestant nga si Michael Pangilinan nga mahimo na siya nga amahan. Lima ka buwan na nga nagsabak ang  iyang  non-showbiz girlfriend . Si Michael ang nagkanta sa “Pare Mahal Mo Raw Ako”.

Naa pa’y komunikasyon

Maglisod og tubag si Sam Concepcion kung pangutan-on kung malinawon ba ang panagbuwag nila ni Jasmine Curtis-Smith. Giklaro hinuon sa singer nga duna gihapon sila’y komunikasyon ni Jasmine.

Louise ug Champ uyab

Uyab na diay sila si Louise de los Reyes ug bokalista sa Hale nga si Champ Liu Pio.  Gibitbit ni Louise si Champ sa iyang birthday party niadtong September 1 ug sweet kaayo ang duha.

Direktor gipangita ni Rap

Gipangita ni Rap Fernandez ang direktor nga si Deo Fajardo aron malakip kini sa iyang gihimo nga documentary movie kalabot sa kinabuhi sa iyang amahan nga si anhing Rudy Fernandez.  Suma pa ni Rap nga si Deo may nakadiskubre kang Rudy busa iyaha gyud kini nga gipangita. Wala gihapon masayod si Rap sa nahimutangan karon sa direktor.

First time voter

Unang higayon ni Kathryn Bernardo nga makabotar sa umaabot nga eleksyon. Gipadayag sa aktres nga dili siya modawat og mga politiko nga mokuha kaniya isip endorser.

Baby Juana

Sa tagsa-tagsa nila nga Instagram account, gianunsyo sa magtiayong Judy Ann Santos ug Ryan Agoncillo nga babaye ang umaabot nila nga anak ilaha kini panganlan og Juana Luisa. Lima na ka buwan nga nagsabak si Juday.  (Sanden J. Anadia)