Solenn engage na!

CEBU, Philippines - Engage na si Solenn Heussaff 29, ngadto sa iyang Argentinian live-in partner nga si Nico Bolzico, 30. Si Isabelle Daza maoy nipabuto sa maong balita pinaagi sa iyang Instagram account kagahapon.

May post usab si Isabelle nga hulagway diin kauban niya ang ilang mga barkada ni Solenn nga sila si Anne Curtis, Georgina Wilson ug Carla Humpries.

Apan sa wala pa ang maong engagement, daan na nang giangkon ni Solenn nga duha ka tuig na sila nga nag-live in ni Nico. Niadtong tungora, namahayag si Solenn nga nagpaabot na lamang siya nga mu-propose niya ang iyang hinigugma.

Namahayag usab si Solenn nga managsama sila og baruganan ni Nico nga dili importante ang kasal basta kay magkasinabot ug maghinigugmaay sila.

Apan niingon hinuon usab siya nga importante ang kasal kun aduna na silay mga anak aron masiguro ang kaugmaon sa mga bata.

True friend

Bugtong si Kris Aquino ug mga igsuon niyang babaye lamang matud pa ang ni-text niya niadtong nakontrobersyal ang iyang pagrampa sa usa ka fashion show pipila ka bulan na ang nilabay. Didto matud pa niya namatud-an kinsa gyud ang tinuod niyang mga higala nga wala nibiya niya sa panahon nga nasugamak siya sa maong sitwasyon.

Nabag-ohan

Nabag-ohan si JC de Vera sa iyang subling pagtaak sa nataran sa GMA7 kagahapon, tulo ka tuig human siya nibalhin sa TV5, hangtud na nga nilayat siya sa ABS-CBN. Apan gikalipay niya nga subli niyang nakita ang iyang mga ka trabaho kaniadto sa estasyon kun diin siya nagsugod. Nag-taping si JC sa Walang Tulugan ni Kuya Germs aron i-promote ang iyang pelikula nga Shake, Rattle &Roll XV.

Duha dayon

Duha ka mga proyekto ang kasamtangan karong gihimo ni Edu Manzano, karon nga nahibalik na siya sa ABS-CBN. Matud ni Edu, usa ka teleserye ug usa ka pelikula ang iyang mga comeback projects sa nahisgutang estasyon og puros isalida sunod tuig.

Salamat Alfie

Mapasalamaton si Kris Aquino ngadto kang Alfie Lorenzo gumikan ka yang pelikulang Feng Shui, una diay nga gitanyag ngadto kang Judy Ann Santos niadtong 2004, apan gibalibaran sa manager sa nahisgutang award-winning actress. Matud ni Kris kun wala pa nibalibad si Alfie, wala unta siya karoy filmfest entry, ang Feng Shui 2, nga una niyang gibituonan ug na-blockbuster niadtong 2004.

Balik trabaho dayon

Nagsabot na matud pa sila ni Marian Rivera ug  ang  GMA7 management nga human sa ilang honeymoon ni Dingdong Dantes, mubalik dayon siya pagtrabaho aron ipadayon ang “Marian” dance show o maghimo siya’g teleserye. Nagkasinabot usab matud pa sila nga kun mumabdos gani siya dayon, prayoridad gayud niya kini.

Happy para sa ex

Happy matud pa si Direk Ramsay sa pagmabdos sa iyang ex-girlfriend nga si Cristine Reyes sanglit dugay na matud pa nga pangandoy sa nahisgutan ang makabaton og baby. Managhigala gihapon matud pa sila hangtud karon ni Cristine. Ang Persian nga si Alex Khatibi maoy amahan sa gisabak ni Cristine.

Suporta gihapon

Suportado gihapon ni Isabelle Daza si  Ryzza Mae Dizon bisan paman og nibalhin na siya sa ABS-CBN.  Niining bag-o lamang, nag-upload og hulagway si Isabelle sa iyang instagram nga giaayo niya ang iyang wallet samtang gitabangan usab matud pa niya si Ryzza sa assignments niini.

Perfect boyfriend

Perfect boyfriend para ni Coleen Garcia si Billy Crawford. Suma pa ni Coleen, tanan nga gipangita niya sa usa ka boyfriend anaa na matud pa kang Billy. Sayud matud pa siya nga suportahan siya sa iyang hinigugma bisag unsay mahitabo ug maingon man usab siya ngadto niini.

Ipagawas ang ebidensya!

Gihimakak ni Jennylyn Mercado ang isyu nga nasigpatan sila nga nag-date ni Kongresista Ronald Singson didto sa Boracay niining bag-o lamang. Matud pa ni Jen nga wala na siyay panahon nga makig-date gumikan sa iyang trabaho ug dili usab sila personal nga magkaila ni Singson. Gihagit ni Jen ang mga tsismosa nga ipagawas ang giingong hulagway nila ni Singson didto sa Boracay.

Wa pay kontrata

Gikatahong aduna matud pay giplano karon nga reunion movie para kanila ni Sarah Geronimo ug John Lloyd Cruz sa Star Cinema. Isunod kini human sa Valentine movie ni Sarah ug Piolo Pascual. Apan ang problema kay hangtud karon wala pa gihapon makapirma og bag-ong kontrata sa ABS-CBN ang nahisgutang award-winning actor.

Palpak: Mura ra og nagduwa-duwa isip anchors sa Aksyon Bisaya sa TV5 kagahapon sila si Atty. Georgia Herrera ug Glenn Soco. Si Herrera makadaghan nasayup sa  gibasa nga balita, samtang si Soco nasakpan sa camera nga perteng katawaa ug wala dayon makabasa sa balita, human ang news item ni Jinky Bargio kabahin sa Tour de Cebu, diin ang nahisgutang news anchor ang starring.

Pakpak:  Big exclusive ang interview ni Aksyon Bisaya reporter King Perez sa maanyag nga babaye nga gitumbok nga wala nibayad sa usa ka salon. Ang newsroom sa tulo ka mantalaan sa Sugbo nag-atang gayud sa maong interview sa maong babaye, sanglit labing unang higayon kini nga nakita siya sa camera, human usab nalambigit og susamang kontrobersiya niadtong Agosto.  Ang  gahom sa social media maoy dako kaayo og natabang nga natumbok ni Perez ang nahisgutang babaye didto sa Asturias, nga gipa-blotter sa usa ka resort human wala nakabayad sa iyang bayronon.

Palpak:  Wala masayud ang mga tagdumala sa Aksyon Bisaya unsay rating sa maong programa. Hagbay ra silang nangayo ug nagpangutana sa management unsay ilang rating aron unta mabuhi ang ilang dugo, apan hangtud karon wala gyud silay nakuha nga detalye. Feeling nila mura sila’g mga sundawo nga wala masayud asa sila mupadulong.

Palpak: Kun dili mag-reformat ug mag-ilis og news anchors ang Aksyon Bisaya sunod tuig, musamot nga mutiurok gyud sila ug walay rating nga mulugwa. Hangtud karon wala gyuy bisan gamay na lang nga hugyaw sa panagpares ni Herrera ug Soco. Gani ang komentaryo sa mga beterano na sa natad sa TV broadcasting mao nga, “among others” ra gyud ang Aksyon Bisaya hangtud karon. Bugtong TV Patrol Central Visayas ug 24 Oras Central Visayas ra gyud ang nagtigi sa mainstream TV.

Pakpak: Apan bisan og lalisunon ang performance sa ilang mga news anchors klaro kaayo ang mga paningkamot sa ilang mga reporters. Puros abtik ug kugihan sanglit pare-pareha ra gyud ang balita nga ilang ihatud sa publiko matag adlaw, may mga higayon pa gani nga ma- outscoop nila ilang mga kontra nga news programs.

Palpak: Makalibog ang TV5 Cebu sanglit naa man untay mga hinog na ug hinog na kaayo aron mamahimong news anchors apan nagpaka buta-bungol ra sila. Kun dili ganahan mukuha og outsider, mahimo kaayo nilang himuong news anchor si Andrea Patena nga bag-o lang nakadawat og pasidungog, ug ipares sa ilang news manager karon nga si Titus Borromeo, kinsa napamatud-an na ang katakus niadtong reporter pa siya sa TV Patrol pipila ka tuig na ang nilabay.

Pictures na lay  pasultion

Bisan paman og managsama sila ni 2013 Miss World Megan Young nga nagpost og “sweet photos” nilang duha sa tagsa-tagsa nila ka IG accounts, nagdumili gihapon si Mikael Daez sa direktang pag-angkon sa ilang relasyon.

Sa pocket presscon para sa iyang pantaserye sa GMA7  nga gibituonan nila ni Andrea Torres nga mao ang “Annasandra” niadtong nilabay nga adlaw, nagkanayon si Mikael ngadto sa mga sakop sa press nga, “ I don’t confirm nor deny.”

Dihang gipangutana sa PEP pinaagi sa text message si Mikael human sa maong presscon kabahin gihapon sa estado sa relasyon nila sa nahisgutang beauty-queen, nagkanayon siya:  “Kahit pa maraming nagsasabi na kami ni Megan but, I guess, I will let the photos speak for themselves.  “Wala namang nakalagay sa captions so we’ll leave things at a cliffhanger muna.”

Hagbay ra nga gidungog ang mao nilang relasyon, diin bisan wala pa nisalmot sa Miss World si Megan may mga taho na nga uyab sila apan gitago aron panalipdan ang tagsa tagsa nila ka mga career.

Gani may mga taho pa nga nigawas nga matud pa lima na ka tuig sila nga managhigugmaay.