Angelica sad-an ni Derek, tapin-an sa ABS-CBN?

Manila, Philippines --- Giangkon sa mga tawo nga suod kang Derek Ramsay nga may problema gyud ang relasyon niini karon kang Angelica Panganiban.

Naa sila sa cooling off stage , ug kinahanglan nila nga mag-istorya gyud og klaro kun buot pa nila nga masalbar ang ilang relasyon.

Ang gikabalak-an sa kampo ni Derek mao nga basin og mabali ang ang sitwasyon sanglit sayud sila nga panalipdan gyud sa ABS-CBN si Angelica.

Samtang gihimakak ni Angelica ang kalambigitan ni John Lloyd Cruz sa ilang problema karon ni Derek.

Wala matud pay problema sa habig ni Derek apan nahadlok gyud sila basin og kini na hinuon maoy mugawas nga may sala.

Samtang sa text sa manager ni Derek nga si Jojie Dingcong: cool-off una sila si Angelica ug ang aktor, wala magbuwag.

“For now, I want to give muna Derek and Angel the space and privacy they deserve. So they can resolve things in peace,” tipik sa text ni Dingcong.

The Road group mulupad na

Karong Domingo na mulupad ang grupo sa The Road para sa red carpet premiere sa maong pelikula sa Hollywood.

May gihisgutan si Joey Abacan sa GMA Films nga ngalan sa Hollywood stars nga mutambong, pero nagdumili siya pagkumpirma kay basin og dili matud pa mahinayun og tambong.

Ang wish lang gyud hinuon ni Alden Richards nga unta makatambong si Megan Fox. Dili gyud matud pa siya magpapugong, magpahulagway gyud siya kauban ang bida saTransformers.

Lakip sa grupo nga mularga si Derrick Monasterio, nga matud pa, makigkita niya didto ang iyang amahan nga dugay na niyang wala igkita.

Dili na makahinumdum si Derrick kanus-a ang katapusang higayon nga nakita niya ang iyang amahan.

Sa May 9 na ang red carpet premiere night nga tambungan pud nila ni Marvin Agustin, Rhian Ramos ug Lexi Fernandez.

Sa May 11 ang showing niini sa Amerika, apan subli kini nga isalida dinhi sa nasud ug sa May 15 gitakda kini nga buksan didto sa Singapore.