Barometro sa tinuod nga numero uno!

CEBU, Philippines - Gabby Lopez: “Sino ang may malaking kita?”

Wala mahulga ang ABS-CBN sa “exodus” sa ilang mga artista paingon sa TV5 sukad pa sa milabay nga tuig.

Lakip sa mga milayat sila si Comedy King Dolphy, Megastar Sharon Cuneta, Diamond Star Maricel Soriano, Aga Muhlach, Willie Revillame, ug gipaabot pud nga mupirma sa Kapatid network si Derek Ramsay sa dili madugay.

Nasayran nga sa labing uwahing pagbisita dinhi sa Sugbo ni Eugenio “Gabby” Lopez III, Chairman ug Chief Executive Officer sa ABS-CBN, gipadayag niini nga gikalipay matud pa sa management ang pagdawat sa TV5 sa ilang “senior citizen.”

Suma pa sa tinubdan sa Banat News Hugyaw masaligon si Lopez sa abilidad sa ABS-CBN pag-umol og mga artista aron musikat, bisan pa gani kadtong gituohan nga dili na unta musikat.

Gisanglitanan sa tinubdan si Maricar Reyes, kinsa gipaabot sa kadaghanan nga muhinay ang career human kini nalambigit og eskandalo, apan misikat na hinuon og maayo karon, diin kasamtangan siyang makit-an sa primetime serye “Nang Dahil Sa Pag-ibig” kauban sila si Piolo Pascual, Jericho Rosales, Christine Reyes ug Christopher de Leon.

“With the networks wide array of talents and the many shows that open doors for new stars, there is no such thing as threat to the company,” nagkanayon ang tinubdan sa Banat News Hugyaw.

Gikatahong “bilyones” na matud pa ang alkanse sa TV5 sukad kini nag-full blast sa operasyon niini, niadtong 2010.

Samtang gisalikway usab matud pa ni Lopez ang pangangkon sa GMA-7 isip numero uno na nga TV network sa Pilipinas pagkakaron. Nakapangutana matud pa si Lopez nga kun tinuod pa nga number one ang GMA-7, ngano man nga mipakunhod man kini sa ilang advertising rates.

“Kung sino ang may pinakamahal na advertising rates..yun ang number one. At the end of the day...ang pinaka-magandang tanong..sino ang may malaking kita?” nagkanayon matud pa si Lopez atol sa usa ka open forum tali sa mga empleyado sa ABS-CBN Cebu niining bag-o lang.

Miuyon pud matud pa si Lopez sa tubag sa mga empleyado sa ABS-CBN Cebu nga aron maklaro kinsay tinuod nga number one, angayan nga ihapon na lang pila ka mga Kapamilya stars ang makita isip product endorsers sa telebisyon karon.

Miingon si Lopez: “True”. Kasi sobrang lakas ng hatak ng artista natin. That is the measure of being number one. Ang artista pa rin natin ang hinahabol ng mga advertisers.” (BANAT NEWS)